.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

31 مايو، 2008

مجموعه من التعليقات من زميل تحولت لتدوينه

وصلتنى عده تعليقات من زميل على تدوينه
( مدير زى ده ميلزمناش )
فطلبت منه تجميع هذه التعليقات وترتيبها لأن الموضوع
واحد ولأن تعليقاته تستحق النشر
فى الصفحه الاولى
وبأنتهز الفرصه وأطلب من الزملاء اللى عايزين يعلقوا
أن يعلقوا على الموضوع المقصود التعليق عليه
وأنا سعيد جدا بهذا التفاعل وبكرر أن المدونه دى مش عاملها ليا لوحدى
دى مدونتنا كلنا وبشكر الزميل الكزداوى وبرحب بيه وسط أحباء كزد اللى بجد
وأليكم موضوعه ببعض التصرف منى
المديرون أنواع واحد يدفعك للأ مام والتانى يجيبك الارض!
مشكلة الأدارة حاليا تؤرق البشر فهى المسؤلة عن نجاح الكيان أوفشله
وما أحوجنا الأن للتعامل الصح وبسلوكيات شيك
تساعد على أضفاء روح العمل الجماعى بين الرؤساء والمرؤسين
فأغلبنا قادهم حظهم العاثرالى التعامل مع مختلف أنواع المديرين
فقد تعاملنا مع الوحشين
وتعاملنا مع السيئين
كما تعاملنا مع الفاضيين من جوه
والرخمين شوية والرخمين جدا
ولكن شهادة حق أقولها أمامكم أن المديرين مش كلهم (سلبيات) فقط
كما يدعى الفاشلون ولكن يوجد فيهم أيضا (الكويسين)
وهذه ليست مجامله لهم ولكنهم يستحقون أن نعطيهم حقهم
وأن كان يبدو للبعض أحيانا أن المديرين كلهم عجينة واحدة
ومن طينه واحده بنفس السلبيات والمساوئ وطريقة التعامل
فأن هناك أختلافات جوهرية تكشف الفارق بين المدير الناجح و المدير الفاشل
فهناك مديرون ناجحون ((ناس فهمه فى الأدارة الصح))
وأخرون فاشلون ونكديون ومن (طينة) تانية خالص
وطبعا دول مش عندنا خالص
ولا المديرين بتوعنا أحسن ..
أحسن.. نترفد
وأهديكم هذه المقارنات فى سلوكيات المديرين
والتناقض الواضح بين الادارى الناجح .. والادارى الفاشل
ربنا يبعدة ويبعدنا عنه.. أو حتى يأخذه
ويريحنا منه
وأقصد من هذه المقارنات
فتح باب المناقشه فى هذا الموضوع وليس أغلاقه
الأدارى الناجح يسعى لتثبيت قدم الشركة
الأدارى الفاشل يسعى لتثبيت قدمة فى الشركة
الأدارى الناجح يحترم أدمية الموظف
الأدارى الفاشل لايعرف أى أدمية
الأدارى الناجح يبدأ كلامه بجملة أنا ( أعتقد )
الأدارى الفاشل يبدأ كلامة بجملة أنا ( قررت )
الأدارى الناجح عندما تتفانى فى العمل يرقيك أويكافئك
الأدارى الفاشل يرقيك عندما تتفانى فى مدحة فقط
الأدارى الناجح يضع لك خطة تتناسب مع قدراتك
الأدارى الفاشل يضع لك خطة تتناسب مع خيالة
الأدارى الناجح يستمع لك
الأدارى الفاشل يستمع لزميلك فى العمل
الأدارى الناجح يثق فيك حتى يثبت العكس
الأدارى الفاشل يثق فى نفسة وبس
الأدارى الناجح يتحدث معك بصراحة
الأدارى الفاشل يتحدث معك بوقاحة
الادارى الناجح مسموح لك أن تشتكية
الأدارى الفاشل مسموح لك أن تمدح فيه
الأدارى الناجح يناقشك أذا طلبت الأستقالة
الأدارى الفاشل يدفعك الى الأستقالة
الأدارى الناجح يعاملك حسب حالتك النفسية
الأدارى الفاشل يعاملك حسب حالتة المزاجية
الأدارى الناجح يقول لك صباح الخير
الأدارى الفاشل يقول لك أ نت جيت
الأدارى الناجح يفضل أن يمدحك أمام الاخرين
الأدارى الفاشل يفضل أن تمدحة أمام الاخرين
الأدارى الناجح يوم حلو يوم مر
الأدارى الفاشل يوم مر يوم أمر منه
الأدارى الناجح يراقب عملك
الأدارى الفاشل يتجسس عليك
الأدارى الناجح يطور أفكارك وينسبها لك
الأدارى الفاشل يسرق أفكارك وينسبها لنفسه
الأدارى الناجح تطلب منه أجازة
الأدارى الفاشل تترجى منه الأجازة
الأدارى الناجح يهنئك بالعيد
الأدارى الفاشل يطلب منك العمل فى العيد
الأدارى الناجح يرى مستقبلك واعدا
الأدارى الفاشل يرى مستقبلك فى يدة
الأدارى الناجح يمسك أعصابة اذا أختلفت معه
الأدارى الفاشل يمسك فى زمارة رقبتك لو فكرت فى الأختلاف معه
الأدارى الناجح ينتظر سماع رأيك فى العمل
الأدارى الفاشل ينتظر سماع رأيك فيه
الأدارى الناجح يثشر أفكارك
الأدارى الفاشل يثير أعصابك وينغص عليك حياتك
فى الشغل وفى البيت
الأدارى الناجح يناقشك بالصوت الأدارى
الفاشل يناقشك بالسوط والخصومات والتهديد
الأدارى الناجح يريدك أن تقول أنا اقترح
الأدارى الفاشل يريدك أن تقول أنا ( أؤيد )
الأدارى الناجح بيجيب مكاسب من أجلك
الأدارى الفاشل بيجيب أجلك
الأدارى الناجح كلمتة زى السيف فى صالح العمل
الأدارى الفاشل كلمتة زى الزفت ليحرق دمك ويكسر نفسك
الأدارى الناجح يعاملك بالتى هى أحسن
الأدارى الفاشل يعاملك باللى فى رجله
الأدارى الناجح يقرأ هذا الموضوع ليكمل ما ينقصه
الأدارى الفاشل يقرأ هذا الموضوع ويبحث عن مين اللى كتبه علشان يخنقه
وعجبى ؟؟؟؟؟؟؟؟؟؟؟؟؟؟؟؟

25 مايو، 2008

شكرا ياريس كزد والله العظيم شكرا



محرر المدونه ..... وجميع العاملين بكزد ..... بجميع القطاعات ..... والأدارات ..... والأقسام ..... يتقدمون بخالص الشكر والتقدير ..... للسيد/ رئيس مجلس الأداره ..... الأستاذ/ البير جورج الضبع ..... لموافقته وأعتماده الفورى لمنحه ..... السيد/ رئيس الجمهوريه ..... وقدرها 30 % من أساسى الراتب ..... ونعاهد سيادته ..... على بذل أقصى الجهد ..... لزياده الأنتاج ..... والمحافظه على جودته ..... لأننا نؤمن أن زياده الانتاج ..... والمحافظه على جودته ..... هما الضمانه الحقيقيه ..... لأستمرارنا وتقدمنا ..... بس أبعت شغل ياريس ..... وميهمكش ...

مدير زى ده ميلزمناش ... أيوه ميلزمناااااااااااا ش



عايزينه بيفكروبـيـبـتكرأوحتى يقترح
مش يقعد يستنى التعليمات
علشان ينفذها وخلاص

20 مايو، 2008

تعليق تحول لتدوينه

وصل للمدونه تعليق من زميل على تدوينه هيا ناقصه كان شقها الأول كالاتى
بنشكرالمهندس أشرف فيظ الله على مجهوداته اليوم فى غسل وتطهير الصهريج ويقول لى أن ده من أختصاص أداره السلامه والبيئه وشكر خاص للزميل/ عينين (حد يعرفنى بالزميل عينين أحسن أنا مش عارفه الظاهر أنا معرفش كل الزملاء حاجه تكسف) عن دوره فى غسل الصهريج ويقول وللعلم أن السلم الموجود داخل الصهريج مكسور كما وضحت أنت هذا كان الشق الاول

19 مايو، 2008

رساله أخيره الى الزملاء غير الأعزاء


وصلنى منذ يومين ما يفيد بأن زعماء حزب البيع والتفريط يحاولون جمع شمل حزبهم بعد هزيمتهم أمام حزبنا الوليد حزب لا للبيع والتفريط وأن الزميل غير العزيز السيد الحلاق أقصد المزين يحاول جمع مبلغ 50 جنيها من كل واحد من البياعين المفرطين أعضاء حزبه لرفع قضيه والمطالبه بأسهمهم ليتملكوها .. أصلهم كانوا وارسينها من جدودهم الباشوات .. أتلم يالسانى أحنا

14 مايو، 2008

هيا ناقصه

وصلنى اليوم من أحد مندوبى المدونه المتطوعين .. والذى كثيرا ماتحدثنا عبر الياهو وتناقشنا سويا .. وأفادنى رأيه ورؤيته فى تدعيم أكثر من تدوينه تم نشرها بالمدونه .. وعنده أفكار جميله بس خياليه شويه المهم يقول أن صهريج المياه اللى بنشرب منه كلنا لم يتم غسله وتنظيفه منذ شهرين ولقد علم بذلك من أحد الزملاء بالهندسيه وهو مصدر نثق به ونحترمه مش كفايه أن المياه الجوفيه بها نسبه عاليه من الاملاح والمعادن كمان مكان تخزينها يترك حتى حتى أيه........ المهم لن نشتكى لأحد احنا حنتصرف فارجوا من الزملاء الذين يعرفون المسؤل عن ذالك الاهمال أن يخبرونا فقط من هو وحنتصرف سنتحول فور علمنا بأسمه الى مصنع بذاءات كثيفه وعاليه الجوده

11 مايو، 2008

من أنتاج شركه كفر الزيات للكيماويات <<--- أضغط هنا


أقوى مبيد للنمل والصراصير
من أنتاج
شركه كفر الزيات للمبيدات والكيماويات
مدونتى
وأنا حر فيها أكتب فيها أعلن فيها أنا حر
وبعدين أنا بأعلن لمنتج أنا شاركت فى أنتاجه
وجربته والنمل والصراصير عزلوا من عندنا
واللى مش مصدق يجربه
وأعلانى هذا غير مدفوع الأجر
علشانك خاطرعيونك يا كزد

10 مايو، 2008

الله اكبر أنتصرنا أنتصرنا ولله الحمد

الله اكبر الله اكبر الله اكبر الحمد لله الحمد لله الحمد لله
انتصرنا انتصرنا انتصرنا
وسيظل اتحاد المساهمين قائما
ولقد تعمدت التاخير فى التدوين بعد النصر لسببين
الاول :- لانى كنت مجهد ومشدود
ثانيا :- لانى كنت مشحون بذائات وكانت ستنطلق بذائاتى واهدافها كانت واضحه جدا
ومعروفه مسبقا
وهم انصار البيع والتفريط
وكنت عامل قائمه مسميها القائمة السوداء وبتضم اسماء زعمائهم وكانت حتبقى فضايح وكنت حجرسهم
منتصر ومن حقى افرح فيهم
لكن الحمد لله صوت العقل هو اللى غلب
وعفوت عند المقدره
وبشكر وبهنى كل من ساهم فى حملتنا ضد البيع والتفريط
واقوللهم الله ينور يارجاله الله ينور عليك يايسرى عبد السميع فى الهندسيه شغلك كان واضح ومؤثر,وهبلتهم
والله ينور ياجمعه ياسحيمى فى الايزوشغلك كان مسمع عندنا
والله ينور يامحمد يازيدان فى الهيدكربون
والله ينور عليك ياعاطف يامهندس بذلت مجهود ممتاذ ومربع المهندس طارق المقدم كان نشيط جدا ومربع المهندسين والكيميائيين فى قطاع المعامل
كان مجهودهم واضح ومسمع ومؤثر عندنا
ماعدا الزميل / احمد على كان فى الكفه الخاسره مش عارف ازاى علمه وشهاداته والقابه العلميه موصلتوش انه يكون فى كفه الفائزين لله فى خلقه شؤووون اظاهر احنا متصابين فى علمائنا اللهم اعف عنا وارفع مقتك وغضبك عنا يارب العالمين
وبهنى شباب قطاع الانتاج الابطال
واقولهم انتم اللى طببتم الكفه والله ينور يارجاله وبهنى المهندس سيف وكل مهندسين ورجال الكهرباء
وكل المحاسبين والامن الصناعى ورجاله المخازن ورجاله الامن بهنيهم من قلبى .. كانوا رجاله
وطول عمرهم رجاله وبهنى الزميله
النقابيه مدام / نجوى .. كان لعودتها الى الحق تاثير كبير على المترددين
وبقولها عود احمد وكان زمانك فى الكفه الخسرانه احمدى ربنا
ولن انسى ان اتوجه بالشكر للسيد رئيس مجلس الاداره وولى عهده لعدم تدخلهم
فى سير حملتنا ضد البيع بالرغم من علو صوتها

لا بالقول ولابالفعل ولابالايحاء كانوا يقدروا بسلطتهم وباموالهم ووعودهم لضعاف النفوس منا

ان يتدخلو فى سير الحمله لكنهم اثبتوا انهم شبعانين ومش باصين لينا فى اللقمه اللى فى ايدينا شكرا ياأجدع قبط فى
بر مصر وعمار يامصر

تتصوروا بقالنا كلمه يارجاله وبقينا مؤثرين
أحباء كزد فلترددوا ورائى

اقسم بالله العظيم

أن أحافظ على أتحاد المساهمين قائما ما حييت

وأن أسلمه للزملاء من بعدى

قويا عفيا

ولن أطالب بحله ما حييت

والله على ما أقول شهيد

وصباح الخير يا أحباء كزد

1 مايو، 2008

تهنئه من القلب





محرر المدونه ... يتقدم بأجمل وأرق التهانى ... للأخوه الزملاء المسيحيين ... وللسيد رئيس مجلس الاداره ... وللساده أعضاء المجلس المسيحيين ... لاحتفالهم بعيد القيامه المجيد ... وعمار يامصر ... ويفضل هلالـك حاضن صليبك ... ولوكره الحاقدون