.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

31 مايو، 2008

مجموعه من التعليقات من زميل تحولت لتدوينه

وصلتنى عده تعليقات من زميل على تدوينه
( مدير زى ده ميلزمناش )
فطلبت منه تجميع هذه التعليقات وترتيبها لأن الموضوع
واحد ولأن تعليقاته تستحق النشر
فى الصفحه الاولى
وبأنتهز الفرصه وأطلب من الزملاء اللى عايزين يعلقوا
أن يعلقوا على الموضوع المقصود التعليق عليه
وأنا سعيد جدا بهذا التفاعل وبكرر أن المدونه دى مش عاملها ليا لوحدى
دى مدونتنا كلنا وبشكر الزميل الكزداوى وبرحب بيه وسط أحباء كزد اللى بجد
وأليكم موضوعه ببعض التصرف منى
المديرون أنواع واحد يدفعك للأ مام والتانى يجيبك الارض!
مشكلة الأدارة حاليا تؤرق البشر فهى المسؤلة عن نجاح الكيان أوفشله
وما أحوجنا الأن للتعامل الصح وبسلوكيات شيك
تساعد على أضفاء روح العمل الجماعى بين الرؤساء والمرؤسين
فأغلبنا قادهم حظهم العاثرالى التعامل مع مختلف أنواع المديرين
فقد تعاملنا مع الوحشين
وتعاملنا مع السيئين
كما تعاملنا مع الفاضيين من جوه
والرخمين شوية والرخمين جدا
ولكن شهادة حق أقولها أمامكم أن المديرين مش كلهم (سلبيات) فقط
كما يدعى الفاشلون ولكن يوجد فيهم أيضا (الكويسين)
وهذه ليست مجامله لهم ولكنهم يستحقون أن نعطيهم حقهم
وأن كان يبدو للبعض أحيانا أن المديرين كلهم عجينة واحدة
ومن طينه واحده بنفس السلبيات والمساوئ وطريقة التعامل
فأن هناك أختلافات جوهرية تكشف الفارق بين المدير الناجح و المدير الفاشل
فهناك مديرون ناجحون ((ناس فهمه فى الأدارة الصح))
وأخرون فاشلون ونكديون ومن (طينة) تانية خالص
وطبعا دول مش عندنا خالص
ولا المديرين بتوعنا أحسن ..
أحسن.. نترفد
وأهديكم هذه المقارنات فى سلوكيات المديرين
والتناقض الواضح بين الادارى الناجح .. والادارى الفاشل
ربنا يبعدة ويبعدنا عنه.. أو حتى يأخذه
ويريحنا منه
وأقصد من هذه المقارنات
فتح باب المناقشه فى هذا الموضوع وليس أغلاقه
الأدارى الناجح يسعى لتثبيت قدم الشركة
الأدارى الفاشل يسعى لتثبيت قدمة فى الشركة
الأدارى الناجح يحترم أدمية الموظف
الأدارى الفاشل لايعرف أى أدمية
الأدارى الناجح يبدأ كلامه بجملة أنا ( أعتقد )
الأدارى الفاشل يبدأ كلامة بجملة أنا ( قررت )
الأدارى الناجح عندما تتفانى فى العمل يرقيك أويكافئك
الأدارى الفاشل يرقيك عندما تتفانى فى مدحة فقط
الأدارى الناجح يضع لك خطة تتناسب مع قدراتك
الأدارى الفاشل يضع لك خطة تتناسب مع خيالة
الأدارى الناجح يستمع لك
الأدارى الفاشل يستمع لزميلك فى العمل
الأدارى الناجح يثق فيك حتى يثبت العكس
الأدارى الفاشل يثق فى نفسة وبس
الأدارى الناجح يتحدث معك بصراحة
الأدارى الفاشل يتحدث معك بوقاحة
الادارى الناجح مسموح لك أن تشتكية
الأدارى الفاشل مسموح لك أن تمدح فيه
الأدارى الناجح يناقشك أذا طلبت الأستقالة
الأدارى الفاشل يدفعك الى الأستقالة
الأدارى الناجح يعاملك حسب حالتك النفسية
الأدارى الفاشل يعاملك حسب حالتة المزاجية
الأدارى الناجح يقول لك صباح الخير
الأدارى الفاشل يقول لك أ نت جيت
الأدارى الناجح يفضل أن يمدحك أمام الاخرين
الأدارى الفاشل يفضل أن تمدحة أمام الاخرين
الأدارى الناجح يوم حلو يوم مر
الأدارى الفاشل يوم مر يوم أمر منه
الأدارى الناجح يراقب عملك
الأدارى الفاشل يتجسس عليك
الأدارى الناجح يطور أفكارك وينسبها لك
الأدارى الفاشل يسرق أفكارك وينسبها لنفسه
الأدارى الناجح تطلب منه أجازة
الأدارى الفاشل تترجى منه الأجازة
الأدارى الناجح يهنئك بالعيد
الأدارى الفاشل يطلب منك العمل فى العيد
الأدارى الناجح يرى مستقبلك واعدا
الأدارى الفاشل يرى مستقبلك فى يدة
الأدارى الناجح يمسك أعصابة اذا أختلفت معه
الأدارى الفاشل يمسك فى زمارة رقبتك لو فكرت فى الأختلاف معه
الأدارى الناجح ينتظر سماع رأيك فى العمل
الأدارى الفاشل ينتظر سماع رأيك فيه
الأدارى الناجح يثشر أفكارك
الأدارى الفاشل يثير أعصابك وينغص عليك حياتك
فى الشغل وفى البيت
الأدارى الناجح يناقشك بالصوت الأدارى
الفاشل يناقشك بالسوط والخصومات والتهديد
الأدارى الناجح يريدك أن تقول أنا اقترح
الأدارى الفاشل يريدك أن تقول أنا ( أؤيد )
الأدارى الناجح بيجيب مكاسب من أجلك
الأدارى الفاشل بيجيب أجلك
الأدارى الناجح كلمتة زى السيف فى صالح العمل
الأدارى الفاشل كلمتة زى الزفت ليحرق دمك ويكسر نفسك
الأدارى الناجح يعاملك بالتى هى أحسن
الأدارى الفاشل يعاملك باللى فى رجله
الأدارى الناجح يقرأ هذا الموضوع ليكمل ما ينقصه
الأدارى الفاشل يقرأ هذا الموضوع ويبحث عن مين اللى كتبه علشان يخنقه
وعجبى ؟؟؟؟؟؟؟؟؟؟؟؟؟؟؟؟

هناك 16 تعليقًا:

غير معرف يقول...

ايه ياباشا عجبتك مقالة المديرون انواع صبرك عليا وانا خغزيك باجمل المقالات بس تكون فى خدمة الشركة لان انا بحب الشركة جداجداجدا.وبحب اللى يبحب كزد وبحبك علشان انت بتحب كزد جداجداجدا..وبحب كل زميل رفض التحرير والبيع جداجداجدا ...وبلاش اسم الادارة او القسم علشان اكتب على راحتى ولو عابز تعرفنى قلبك حيدلك عليا

واحد من العمال يقول...

أولا :-أنا مش باشا
أنا واحد من العمال
ثانيا :- أنا برحب بيك لانك نورتنا
وياريت تتابعنا وتتحفنا بمواضيعك ولو فيه مصادر لمواضيعك ياريت تبقى تذكرها
للعلم .. وأنت نورتنا..
أه والله نورتنا

غير معرف يقول...

انت عايز ايه بالظبط انت فاكر انك كده حتفتح عكا
كان غيرك اشطر. وكلامك لا حيقدم ولا حياخر والمديرين اللى مش عاجبينك
حيفضلوا على قلبنا
انت باين عليك عايز تبقى مدير يعنى انت عبده مشتاق وفاكر ان اللى بتعمله حيخليهم يعملوك مدير
وبعدين ده انت بقيت عين الاداره يعنى جاسوس صباح الخير يامصلح شوفلك لعبه تانيه مدير وزهقان منك

غير معرف يقول...

ليا اقتراح تعمل مكان للعلان عن افراح الزملاء ومان الفرح وميعاده وده هيساعد العمل بالشركة على الدعية لافراحم وانتا كده تبقى قدمتنا خدمة كبيرة

غير معرف يقول...

انا سمعت ان الزملاء فى الهيدكاربون بقيادة محمد ذيدان بيلمم علشان يشترو فلتر تنقيه مياه والبركة فيك انت ومحمد عطية وشكرا للاخ /محمد ذيدان والادارة بتاعة الهيدكاربون

دكتور كسلان يقول...

السلام عليكم
مدونتك جميلة
وعجبتنى اوى الفكرة
لازم كل فئات الشعب تتكلم
ربنا يوفقك فى شغلك

سلااااااااام

كلام على بلاطة يقول...

ايه اكلام الكبير ده يا عم
لكن احنا الاداريين بتوعنا يمتازوا بالاتى
لا يفهم
لا يعى
لايهتم
لا يستوعب
يمشى للوراء
ده صفات الاغبية حسب ما رأيت
تحياتى

غير معرف يقول...

مفيش مواضيع جديدة ولا إييه

adryano يقول...

والله انا مش شغال فى الشركة انا أبن احد العاملين بالشركة اقترح حاجتين مهمين جدا:
1-انك تهتم بأخبار جميع اجواء الشركة يعنى زى ما تزم الوحش امدح الكويس

2- اللى شايف انك كدا مش حتفتح عكا وشايف انك بتنفخ فى اربة مقطوعه او بمعنى اصح المدونة مش عاجباه يتكرم علينا وام يدخلش من اصله

واحد من العمال يقول...

الى المدير اللى زهقان منى
اولا :- لا مش حفتح عكا بس كويس ان انا قدرت ازهقك .. منتم مزهقينا من زمان .. حرام ازهقك شويه
وكلامى بيقدم ايوه بيقدم..وامثالك همه اللى ماخرينا والمدير اللى زهقان زيك هو سبب وجعنا
ثانيا:- انا لو حبقى مدير زيك ميلزمنيش وبعدين انا مش من عبيد المسمى الوظيفى
وبعدين انا منفعش ابقى مدير زيك
لانى بفكر
ثالثا:- اما عن كونى بقيت عين الاداره
فده مخطرش فى بالى بس ايه المانع انهم يعرفوا احنا بنفكر فى ايه وازاى .. وانهم يعرفوا ان احنا احباء كزد(طبعا منتش منهم) بنحب كزد اكتر منهم وعلى العموم انت بمخك ده لا نورتنا ولاشرفتنا

واحد من العمال يقول...

الى صاحب اقتراح الاعلان عن افراح الزملاء انا مش متاخر بس انا مقدرش اتابع لوحدى ابعتولى الاعلان وموعده ولو صوره كمان تبقى اشيك
وانا تحت امركم
----------------------
بالنسبه لموضوع فلتر الهيدكربون فانا وصلنى فعلا ان الزميل محمد زيدان نفذ
وبدا بس انا مستنى لما الفلتر يركب وانا حعمل الازم وحتشوف
ويارب حد يتحرك فى مكان تانى وتتكرر
ونورتونا والله العظيم نورتونا

واحد من العمال يقول...

الى دكتور كسلان
شرفتنى بالزياره وبمجاملتك الرقيقه وبتشجيعك
وبعدين انت مش كسلان خالص
وتقبل تحياتى وزياراتى القادمه

واحد من العمال يقول...

الى حضره الناظر(صاحب مدونه على بلاطه)
مرورك على مدونتى المتواضعه شرفنى وشرح قلبى وشجعنى وادينا بنحاول
وتقبل خالص تحياتى وزياراتى القادمه

غير معرف يقول...

أنا عندى فكره كويسه عايز اعرضها عليك وعلى كل اللى قالوا لا للبيع
ليه منستغلش نجاحنا لما وقفنا وقفه رجاله وقلنا لا للبيع ونتلم ونتكتل ونتفق على مين اللى يمثلنا فى اتحاد المساهمين ومجلس الاداره والنقابه حتى مجلس اداره الجمعيه التعاونيه وكفايه انضحك علينا كتير بس احنا دلوقت اظن بقينا فاهمين انا عايزك تفكر فى الاقتراح ده وتحاول تطوره وتستغل شعبيتك الحاليه وشعبيه المدونه وتقودنا فى اتجاه التكتل من اجل فرض من يمثلنا فعلا
بس بشروط ويكون لنا لتكتلنا قائمه مرشحين تدعمها المدونه ونسمى قائمتنا
(قائمه احباء كزد)ونعمل المستحيل علشان ننجحهم مااحنا عملنا المستحيل ضد البيع ونجحنا فكر فى الموضوع بهدوء
ورويه حتلاقى كلامى صح وممكن وفى اتظار رايك
وتحياتى لكل احباء كزد

واحد من العمال يقول...

الى adryano الغالى ابن الغالى
اشكرك جدا على متابعتك وتفاعلك معنا
وادينا بنحاول
وربنا يوفقك
-----------------------------
الى الزميل صاحب أقتراح التكتل
أقتراحك جميل ومهم وهو قيد البحث وسانشره فى الصفحه الاولى
وأشكرك لتفاعلك معنا

غير معرف يقول...

الزميل نسى الادارى او المدير العام
المزاع وفى روايه اخرى المعار اوالهجاص وفاكر علشان احنا بنسمعه نبقى مصدقينه اه لو يعرف احنا بنقول عليه ايه لما بيخلص كدب ويمشى .. فكركم لو عرف الذى نقوله عليه حيبطل معر ولا مش هيقدر وسلامى لكل ادارى هجاص
تنترالالا تن تن