.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

30 مايو، 2009

رساله إلى شقيقى المهاجر .. إحتمال يكون عندك حق !!

تحديث

إلى شقيقى المهاجر من مصر

أنا بكلمك من مصر

والظاهر كده .. يعنى .. إحتمال .. يكون عندك حق !!

تتصور مين عايز يهاجر.. من مصر !!!

شوف الخبر ده على لسان الشاعر على سلامه

وحتعرف ساعتها إنه إحتمال يكون عندك حق

حتى هوه كمان عايز يطفش

من مصر !!!


ولا تعليق !!!

******************************

تحديث

نظراً لعدم عمل الفيديو لدى بعض الأخوه المتابعين إليكم القصيده وإسمها

على باب سفاره كندا

لمحت إبليس وفى إيده إستماره

بقوله إيه على فين

قالى بص

ياهجره يا إعاره

أنا كفرت ملاقيش معاك سيجاره

ياراجل أنا خلاص

لا بقيت وسواس

ولا خناس ولا ليا عيش وسط الناس

خلاص بقالى سنين عاطل

وإنتو بتعرفوا تقلبوا الحق باطل

وتقتلوا القتيل وتسلكوا القاتل

ومفيش مشاكل

خلاص أنا مسافر مهاجر

ياراجل ده أنا بقيت أوسوس بالمقلوب

أقول للحرامى إنت مش حتوب

يعنى إنت حتعمل كل الذنوب لوحدك

وأنا إبليس حشتغل إيه

واعظ ولا كمسارى فى أوتوبيس

ياراجل أنا خلاص ...

زمان كنت أقعد أستنى حد ينسى

يسمى وهو بياكل لقمته

دلوقت صراحه كل أكلكم ملوث

والواحد بيخاف على صحته

ده مفيش ضمير أساساً علشان أموته

دا من كتر ما لطشت معايا

مشيت مع الناس اللى بتقول كفايه

ومفيش فايده

14 مايو، 2009

61 عاماً على النكبه !! نكبتنا كلنا على بعضنا

مشاركه واحد من العمال فى حمله إحياء ذكرى
الذكرى ال 61 للنكبه (عائدون)
وهى أضعف الإيمان
--------------------------------------------
توثيق لبدايات النكبه.. نكبتنا

------------------------------------------
-----------------------------------------
للذكرى
وحتى لا ننسى حنظله الرمز وأصله وفصله
والغاضب منا منذ ميلاده فى عام النكسه و حتى الأن !!!


إنه غاضب منا لذلك يعطينا ظهره
منذ ولد أعطانا ظهره !!!
فمتى ياترى سيعطينا وجهه ؟؟؟
*****
ربما ينظر إلينا
ويعطينا وجهه
وينظر لنا
من هناك فقط
عندما يعود
فقط
عندما
يعود
متى يعود ؟؟

**********************************
تهانى وتبريكات
************************************
أحمد عزب يقول...
ألف ألف مبروك
للزميل/ أحمد إسماعيل الدلجمونى
لزفاف نجله
المهندس / ايهاب
وبالرفاء والبنين
**********************
ومحرر المدونه يتقدم بأحر التهانى القلبيه
للزميل أحمد الدلجمونى
لزفاف نجله
وألف مبروك ياحاج أحمد
**********************

7 مايو، 2009

ردى على تعليق الغاليه جداً جداً .. وفاء هانم بركات

وفاء بركات هانم من بنى سويف تقول ...
واحد من العمال المحترمين جداً لك مني كل تقدير وإعزاز لأنك بجد عضو فعال في هذا المجتمع وعندك إنتماء عالي جداً لعملك وقبل مايكون مصدر رزقك هو عشقك وعلشان كده بحثت عن العله وعرفت الداء وقررت رحلة العلاج ..فعلاً أنا معاك بإن المبيدات المنزليه كانت سيئه وذات رائحه خانقه بدون نتيجه فعاله وتشجيعا لشركتكم ومنتجاتها أول مينزل لها حاجه للصراصير والنمل خبرنا لأن عندنا في الصيف الصراصير بتخرج من بلاعات الشوارع بطريقه غريبه وبتهجم علي البيوت جبت البودره بتاعتكم كانت الحشره بتمشي عليها عادى فكرتني بالأسلحه الفاسده في حرب فلسطين . ربنا يحقق لكم النجاح وتحققوا أعلي معدل في التوزيع والأرباح ..ومتنساش التاج..تحياتي
05 مايو, 2009 10:48 م
هذا التعليق على التدوينه السابقه
---------------------------------------------
رد واحد من العمال
الغاليه جداً جداً وفاء هانم بركات
أولاً أشكر لكِ كلماتك الجميله كما أشكر لكِ متابعتك وتواجدك الدائم والعطر بمدونتى العماليه المتواضعه
كما أأسف لأن البودره بتاعتنا لم تحقق أملك فى القضاء على الصراصير ولكنى أستطيع أن أؤكد لكِ أنه ربما يكون تاريخ الصلاحيه قد فات فبرجاء التأكد من تاريخ الصلاحيه عند الشراء فى المرات القادمه .. وأرجو سرعه أرسال عنوانك البريدى .. كى أرسل لكِ هديه تعويضيه من منتجاتنا للقضاء على الصراصير اللعينه ولكى أثبت لكِ أن منتجاتنا صنعت بأيدى مجموعه من القتله المحترفين رسالتهم فى الحياه القتل والقتل فقط .. ولكن قتل كل ما يؤرق الأنسان من الحشرات المنزليه والزراعيه
وعلى فكره لم أنسى التاج
ودمتِ فى أمان الله وحفظه
***********************************************
فكره إعلان

بعد ردى على تعليق الغاليه جداً وفاء هانم بركات خطرت لى فكره اعلان للروش كيلر لأن توزيعه وموزعه عليل (ربنا يشفى ) رغم فاعليته الأكيده ونظراً لأن المدونه مدونتى .. وليست خاضعه لأحد سواى .. رغم وجود شركاء لى بالفكر والهدف .. وأكتب فيها أفكارى .. أو أعلن فيها لأى منتج .. أنا حر .. ونظراً لأن موزعنا الوحيد فى ثبات عميق ومرحرح ومأنتخ على الأخر ونظراً إن مروجينا فى كزد زى ما قلت من قبل بيروجوا .. بس على روحهم .. قررت إهداء فكره هذا الإعلان لمروجى كزد الحبيبه مجاناً .. ومش عايز منهم حاجه .. بس يسيبونى فى حالى

فكره الأعلان تصلح لجميع منتجات كزد

بعد تقديم المنتج وعرض مزاياه

يظهر صوت جهورى وعميق لايوجد بنبراته ماينم عن أى رقه أو رحمه ويعطش الجيم ويقول :

(من أنتاج مجموعه من القتله المحترفين نعم محترفين .. رسالتهم فى الحياه القتل والقتل فقط .... ولكن بأجر .. نخلصكم من كل ما يزعجكم من الحشرات المنزليه والزراعيه) تن ترالالاً تن تن

ولكم أن تتخيلوا الأثر الباقى فى عقل المشاهد المستهدف بالأعلان .. تخيلوا أنتم بقى يابتوع التروييج .. وتصبحوا على خير يامروجى كزد .. وتصحوا على خير إن شاء الله .. عشان تناموا تانى !!!

**********************************************

تحديث

رد وفاء بركات هانم تقول ...
واحد من العمال المحترمين الشرفاء رد فعل ليس غريبا علي من يحب شركته حتي العشق ..أحترمك كإنسان تتقي الله في عملك وأقدرك كعامل لايتواني عن خدمة شركته ويتحدث عنها وكأنه يرسم لوحه أو يلقي قصيدة شعر .. أنه يغار عليها يغار أن يقال إن منتجها دون المستوى .. وأن هناك منتجات أفضل منها فكان رده رد الواثق من محبوبته .. أشكرك أخي وأتقبل هديتك وسأحتفظ بالعبوه بعد إستعمالها كرد علي أى حد يتهم العامل المصرى بالإخفاق .. ولن أقبلها علي سبيل التعويض .. لأن ردك عوضني عن شعورى بالأحباط بعد إغراق الأسواق المصريه بالمنتجات الصينيه .. وكأن مصر نضبت فيها العقول التي تفكر والسواعد التي تشيد .. أكلمك وأنا إبنة وأخت أحد العمال التي أشادت سواعدهم البناء فأطلت علي الدنيا تحكي بطولات عمال مصر المحترمين الشرفاء في كافة المجالات أقدر وأحترم أصحاب الأيدى العامله التي أحبها الله ورسوله عليه أفضل الصلاة والسلام

وبلغ سلامي لجميع القتله المحترفين
10 مايو, 2009 01:34 ص

***********************************************

تحديث

وكمان تعليق من بنى سويف

د. ياسر عمر عبد الفتاح صيدلى ومن بنى سويف أيضاً يقول...

لو كل واحد في شركه يبقي مخلص ليها كده مكنش ده حالنا لو كل (البروليتاريا ) كانوا بالثقافة دي والفهم ده .. كنا اتغيرنا كثير
فكرة الإعلان قوية جداً علي فكرة . مع إني أول مرة أشوف المنتج ده رغم إننا بنبيع في صيدليتنا منتجات كثيرة للصراصير والنمل والكلام ده خلي الراجل الموزع بتاعكم وقسم التسويق يشدوا حيلهم شوية عاوزين ننفعكم

08 مايو, 2009 03:16 م
وصلنى هذا التعليق بعد نشر هذه التدوينه

********************************************
رد واحد من العمال
أقول أيه بس حاجه تكسف .. ردوا أنتم يابتوع التسويق والترويج أو يرد موزعنا الوحيد جداً جداً !!!!!!
دكتور صيدلى و عنده صيدليه ويتعامل مع منتجات عديده لإباده النمل والصراصير وبيقول أول مره أشوف المنتج ده !!!!!!!!!
ايه رأيكم يابتوع ( اللى عايزنى يجيلى يجيلى أنا مبروحش لحد) إحنا مش موجودين فى صعيد مصر !!! عايزين موزع فى وجه قبلى

ياخلق هوووووووووووووووووه


وبشكرك يادكتور على كلماتك الطيبه ولأنك عايز تنفعنا ..
بس الظاهر إحنا اللى مش وش نعمه !!!

ولله الأمر من قبل ومن بعد

ودمت فى أمان الله وحفظه

********************************************

تحديث كمان وكفايه كده .. التدوينه تحولت لبحث تسويقى

Soul.o0o.Whisper صيدلانية بإذن الله من المنصوره تقول ...
السلام عليكم و رحمة الله و بركاته

أولا : لازم أقول لحضرتك إنى بجد بجد سعيدة جدا جدا بالمدونة دى و فكرتها الرائعة أنا قرات الكام تدوينة اللى فاتوا و الحمد لله عرفت ايه kz و ان شاء الله متبقاش kz بس و تبقى eg كلها بنفس روحك و حماسك و اقدامك دا بجد ربنا يبارك لحضرتك يارب أنا بردوا شغالة فى صيدلية و أول مرة اسمع أو أشوف منتج بالاسم ده أول مرة أسمع اصلا عن الشركة ؟؟!!. يمكن عشان كدا مفهمتش ايه كزد دى؟؟؟ لكن حقيقى بجد أنا فخورة جدا ان فى عقول كدا ربنا يبارك لكم يارب و ان شاء الله هتابع
10 مايو, 2009 06:26 م

*******************************************

رد واحد من العمال

أنا مش عارف أقول إيه والله .. أنا فى نص هدومى .. أنا حاسس إنى بتضائل على الكرسى لدرجه إنى بقيت مش طايل الكى بورد .. إستنوا لما أنط على إيد الكرسى ومنه الى المكتب وبعدين أوصل للكى بورد .. الحمد لله .. أدينى وصلت وواقف الأن بجواره .. المهم نكمل ..لكنى أشكر الأخت العزيزه سول على كلماتها الرقيقه ولأنها عرفتنا إننا أيضاً غير موجودين بالمنصوره اللى بينا وبينها فركه كعب يعنى محتاجين موزع كمان فى وجه بحرى ماإحنا قلنا الكلام ده قبل كده طيب المروجين والمسؤلين عن التوزيع والموزع والمديرين اللى زى الرز دول ساكتين ليه ..

يمكن سكوتهم سكوت إستراتيجى ىىىىىىىىىىىىىىى

*****************************************

تهانى وتبريكات

*****************************************

أحمد عزب الدلجمونى يقول...
أتقدم بالتهانى الحاره للكيمائى / أحمد على

لترقيته لمنصب مدير عام

وأتمنى له التوفيق والنجاح فى منصبه الجديد

*********************************

ومحرر المدونه يهنىء الزميل أحمد على

بالترقيه وألف مبروك

وعقبال الدكتوراه

********************************

أحمد عزب الدلجمونى يقول...
وأتقدم بالتهانى الحاره للزميل الأستاذ / محمد القلعاوى

لزفاف نجله

المهندس /أحمد القلعاوى

وألف مبروك

ياحاج محمد ياقلعاوى

والف مبروك ياخالد ياقلعاوى

*****************************

ومحرر المدونه يهنىء الزميلين بزفاف

المهندس /أحمد القلعاوى

وألف مبروك

ياحاج محمد ياقلعاوى

******************************