.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

30 مايو، 2009

رساله إلى شقيقى المهاجر .. إحتمال يكون عندك حق !!

تحديث

إلى شقيقى المهاجر من مصر

أنا بكلمك من مصر

والظاهر كده .. يعنى .. إحتمال .. يكون عندك حق !!

video

تتصور مين عايز يهاجر.. من مصر !!!

شوف الخبر ده على لسان الشاعر على سلامه

وحتعرف ساعتها إنه إحتمال يكون عندك حق

حتى هوه كمان عايز يطفش

من مصر !!!


video

ولا تعليق !!!

******************************

تحديث

نظراً لعدم عمل الفيديو لدى بعض الأخوه المتابعين إليكم القصيده وإسمها

على باب سفاره كندا

لمحت إبليس وفى إيده إستماره

بقوله إيه على فين

قالى بص

ياهجره يا إعاره

أنا كفرت ملاقيش معاك سيجاره

ياراجل أنا خلاص

لا بقيت وسواس

ولا خناس ولا ليا عيش وسط الناس

خلاص بقالى سنين عاطل

وإنتو بتعرفوا تقلبوا الحق باطل

وتقتلوا القتيل وتسلكوا القاتل

ومفيش مشاكل

خلاص أنا مسافر مهاجر

ياراجل ده أنا بقيت أوسوس بالمقلوب

أقول للحرامى إنت مش حتوب

يعنى إنت حتعمل كل الذنوب لوحدك

وأنا إبليس حشتغل إيه

واعظ ولا كمسارى فى أوتوبيس

ياراجل أنا خلاص ...

زمان كنت أقعد أستنى حد ينسى

يسمى وهو بياكل لقمته

دلوقت صراحه كل أكلكم ملوث

والواحد بيخاف على صحته

ده مفيش ضمير أساساً علشان أموته

دا من كتر ما لطشت معايا

مشيت مع الناس اللى بتقول كفايه

ومفيش فايده

هناك 63 تعليقًا:

Ramy Wasel يقول...

فى 1000 سبب يخلى الواحد يهج من البلد
وفى مليون سبب يخلى الواحد يقعد فيها
ويموت علشلانها
صحيح مصر بقت قاسيه على ولادها
بس دى بلدنا
ومش حنسبها ابدا
واكيد بكره احلى
ولازم يفضل الامل موجود
والا يبقى العيشه ملهاش لازمه

اللؤلؤة يقول...

الأخ واحد من العمال
السلام عليكم
رغم كل الصعاب يجب ألا نهرب مهما حصل وكل حاجة لها نهاية الظلم وامهانة والتجبر لهم نهاية
دمت بكل الود

عاشقة الأحزان يقول...

السلام عليكم


احم احم


مش تزعل منى بجد هى غلطة كتابيه

ههههههههههههه


المهم انا جيت ارد الزياره

ياقمر

صبحاوك سكر ومعطر بذكر الرحمن

بالنسبه للرساله الموجها لشقيقى المهاجر


جميله جدآ
وكلنا بجد طهقنا وزهقنا من مصر هى عملة مصر لينا ايه


لالالالالالالالالالالالالالالالا
لالالالالالالالالالالالالالالالا
جديد

انا معك بكل كلمة

المهم سعدت بيك جدآ وبمروك الكريم

وان شاء الله يبقا التواصل بيننا


تحياتى

انوسه

norahaty يقول...

بجد بجد بجد
اقولك الحل
وعن تجربة كمان
تتفات 3 أو 4سنين
تعمل فيهم شوية فلوس
تجيب اساسيات لحياة هنا
وترجع تعيش هنا وتربى اولادك
هنـــــــــــــــــــا لاننا
مالناش بلد تانية غير هنــــــا

د. ياسر عمر عبد الفتاح يقول...

أهو ده اللي ناقص
بس ده بالذات ياريته يسافر وغور في ستين داهية (ابليس يعني)

ماما أمولة يقول...

لو كل واحد ساب البلد وهاجر

مافيش حاجة ها تتغير في البلد

لازم نصبر ونحاول نغير بنفسنا يمكن الدنيا تتصلح لاولادنا

تقديري

ذو النون المصري يقول...

فيه حد مش عايز يطفش من مصر الان؟؟؟؟
كل اغلبنا يرغب في الهجره الان

عبد من عباد الله يقول...

هو ده علي سلامه
بتباع كتير من اشعاره في كل حته و العمود بتاعه " سلامات " في جريده المصري اليوم ...

شكراً ليك اول مره اجي هنا

Soul.o0o.Whisper يقول...

السلام عليكم و رحمة الله و بركاته

بالوصف اللى ابليس دا قاله

يبئا أكيد لك حق تطفش

إلا بئا لو خلينا ابليس يرجع عن قراره
;)

أكيد ساعتها مش هنعوز نسافر
و لا نهج من بلدنا



دمت بود

وفاء بركات يقول...

يلوثوا نيلها يسرطنو اخيرها ملناش بلد غيرها دى جوه دمنا نتحرق فيها ندعك عليها ونصرخ بأعلي حس بنحبك يامصر
فيها نلعن أبو خاشها حتي لو كلنا فولها وبغاشها ونبعد عنها قلبنا يحن ومن البعد يئن بحبك يامصر
سحره لنا يمكن بس اللي مش ممكن نكره مصر.
ده إحساسي بيها وكل واحد حر في إحساسه

من غير عنـــوان يقول...

شكرا على البوست الجميل

هندسة وصفية يقول...

بغض النظر عن مين الي هيهاجر
انما اقولك و انا عايش برة مصر
طظ
و لا حتة في الدنيا تسوي حبة رمل في اي حتة في مصر
فعلا والله
و لا هنهاجر كلنا و نسيبها لولوووود ال.....؟؟؟

واحد من العمال يقول...

بلدياتى /رامى واصل

دى موجه إحباط بتنتابنى لما بشوف بلدى ماشيه زى السلحفه
وإحنا بنزق ومش شايفين تقدم
وأدينا قاعدين وحنفضل نحلم إن بكره أحلى من النهارده

ودمت أخى بخير

واحد من العمال يقول...

العزيز /صاحب اللؤلؤه
وعليكم السلام ورحمه الله وبركاته

الصعاب بقت كتير وبتزيد
وصوتنا إتنبح
بس برضه مش حنسافر ومش حنسبها
ومش ساكتين
وحنفضل نحلم

ودمت أخى بخير

واحد من العمال يقول...

عاشقه الأحزان
وعليكم السلام ورحمته وبركاته

أنا مش زعلان ولا حاجه
أنا لفت نظرك بس
وقلت مسامحك
وكلنا زهقانين وحنطق منها بس بنحبها
وحنفضل نحبها حاجه غريبه .. مش كده

ودمتِ بخير

واحد من العمال يقول...

norahaty

الحل ده معقول
بس لو أنا غاوى سفر
وبعدين اللى بيرجع بيلاقى كل حاجه زى ماهى
يعنى مصر محلك سر
دا اللى جايب لى إحباط

المهم نورتينا والله

ابو صهيب ( الجمعاوي الاصيل)سابقاً يقول...

اخي الفاضل

السلام عليكم ورحمة الله وبركاته

انا عارف ان في الف سبب وسبب يخليك تطفش من مصر

لكن عن تجربة فقد سافرت احدى الدول العربية بالخليج

هرباً من اوضاعنا في مصر ولكن اقول لك

ان مصر هي اعظم دول في العالم ولكن العيب مش فيها

العيب فينا احنا احنا اللي بنستسلم للواقع اللي احنا فيه

ومش كده وبس ده احنا بنفكر في الهرب منه وليس مواجهته طيب لما كلنا نسيبها ونهرب من هيرجع حقنا

لابد من المواجهه حتى لا نندم بعد ذلك

ودمتم بخير

dr aly khamis يقول...

السلام عليكم و رحمة الله و بركاته
أخى الكريم
( واحد من العمال )
بجد حلوة المدونة و حلو انتماءك و نشاطك...بارك الله فيك

للأسف الفيديو مش عايز يشتغل عندى ...
بس على العموم اتنين من إخوانى الصيادلة الأكارم علقوا قبلى ( د/ ياسر و د / سول) و أنا طبعا ماينفعش أطلع عن اجماع اساتذتى ....
هما قالوا حاجة عن ابليس ...الله يلعن ابليس و كل من يساعده ...!!!!!

واضح ان الكلام عن الهجرة ...
انا دلوقتى فى السعودية من 7 سنين و هموت علشان ارجع مصر و قررت بعض التضحيات علشان حلمى يتحقق قريبا جدا ان شاء الله...

احييك على مدونة التنمية البشرية و تطوير الذات و مدونة الصحة و التغذية ( بتقطع علينا يا عم ؟؟!!!)
:)

بارك الله فيك أخى الكريم

تقبل تحياتى

الازهرى يقول...

اولا شكرا على سؤالك الجميل عنى
لكن الاسباب كنت نشرتها فى ذكريت ونسيت انشرها فى الفارس الاخير


اما بخصوص الهجرة انا صراحة مش عارف مين على سلامة واعترف بجهلى لكن انا ولو اجتمع الكل على انهم يهاجروا برضه قاعد فيها
لان ببسباطة لو احنا هاجرنا تفتكر مين ممكن يصلح بلدنا ويرجعها من تانى ؟

تحياتى وخالص مودتى

اوراق قديمة يقول...

اخى واحد من العمال
اعرف ان هناك الكثيرين قد اصابهم الاحباط والقهر والفقر
لكن انا من الناس اللى مايتمنوش ابدا يسيبوا بلدهم تحت اىظرف وباشعر ان اللى يتمرد على بلدة كانة بيتمرد على امه
لانها جاهلة او فقيرة بس دى فى الاخر امه
حقيقة مايقدرش ينكرها او يتجاهلها
مدونتك حقيقى جميلة
ام محمد

واحد من العمال يقول...

د. ياسر عمر عبد الفتاح

ياريت إبليس يسافر
ياريت يسافر لأنه مش قادر يفسد حد
لكن يسافر علشان الفساد بقى صناعه محليه وبنتفوق فيه يوم عن يوم وعندنا إكتفاء ذاتى
يبقى بلاش يشافر

ودمت أخى بخير

واحد من العمال يقول...

ماما أمولة

منورانى والله
وعندك حق كل الحق

ودمتِ بخير

واحد من العمال يقول...

ذو النون المصري

للأسف الكل بيحلم إنه يهاجر من مصر
ونفسى يحصل العكس
ربنا يقرب البعيد

ودمت أخى بخير

واحد من العمال يقول...

عبد من عباد الله

مرحب بيك نورتنا والله
أيوه هو ده على سلامه الشاعر
وبيكتب فى الدستور والمصرى اليوم
وأنا سعيد لأنى عرفتك بيه
ولا شكر على واجب

ودمت أخى بخير

واحد من العمال يقول...

Soul.o0o.Whisper

ياريت يرجع عن قراره
لأن رجوعه عن قراره معناه إن لسه فيه ناس مفسدتش وحيلاقى شغل

ودمتِ بخير وبود

واحد من العمال يقول...

الغاليه جداً/وفاء هانم بركات

كلنا بنحبها لكن لما نشوف الناس بتتقدم وإحنا محلك سر
نزعل ولا منزعلش
وبعدين إحنا بنأكل من زمان فولها
ولسه مشفناش بغاشها
وربنا يصلح الأحوال
وأدينا قاعدين وبنحاول

ودمتِ سيدتى بخير

فارس عبدالفتاح يقول...

وانا العبد الفقير من بره مصر بقول للاخ الشاعر طظ صظ في مصر وبقول للاخ ابليس ربنا يوفقك

فشكووول يقول...

عزيزى عاشق الكى زد
شكرا على الزياره
اما من ناحية ابليس والله عنده حق لان احنا بقينا كلنا اباليس والراجل الله يخرب بيته مش لاقى ياكل عيش عندنا فى بلدنا فكفر وعايز يسيب البلد عشان ح يعمل ايه ... ما بقاش له شغل.
تحياتى لهذا الفيديو الجميل وتحياتى لك

حلـم،، يقول...

احيك ياكادح..موضوعك مهم ودمت

لاسع افندى يقول...

انا كمان عايز اهاجر

تحياتى

واحد من العمال يقول...

م / محمد البنا

أشكر لك كلماتك الرقيقه

ومنورنا والله

ودمت ياعمنا بخير

واحد من العمال يقول...

هندسة وصفية

أنا عارف إن مفيش حتة في الدنيا تسوي حبة رمل في اي حتة في مصر
بس نفسى تتحرك بينا لقدام
الوضع للأسف محلك سر
ومش حنسيبها

ودمت أخى بخير

واحد من العمال يقول...

ابو صهيب ( الجمعاوي الاصيل)سابقاً


وعليكم السلام ورحمة الله وبركاته
الأسباب للهجره كتيره
وأعلم إن مضر عظيمه
لكن للأسف إحنا اللى مش عظام
ونورتنى

ودمت أخى بخير

واحد من العمال يقول...

د/ على خميس

وعليكم السلام و رحمة الله و بركاته
نورتنا والله يادكتور
وأشكر لك كلماتك الجميله
وبارك الله فيك
وترجع لمصر بالسلامه

ودمت أخى بخير

واحد من العمال يقول...

الازهرى

لا شكر على واجب أخى العزبز
ويبقى كده أنا مقصر مع زكريات وسأتفادى هذا التقصير
وعلى سلامه شاعرمصرى جميل تحس إن اللى بيكويه بيكوينا حاول تتعرف عليه ومش هتندم
وأدينا قاعدين ومش حنسيبها
ويارب ترجع تحضنا كلنا من تانى

ودمت أخى بخير

واحد من العمال يقول...

اوراق قديمة

ولا أنا أتمنى أفارق ترابها
بس أهى موجه إحباط وبتعدى
ونورتينا والله وبشكرك على كلماتك الجميله
وأتمنى ألا تحرمينا من طلتك البهيه

ودمتِ بخير

واحد من العمال يقول...

فارس عبدالفتاح

منورنا أيها القومى الأصيل
أنا كنت بقول زيك كده
بس بعد ما بأفضفض
برجع أقول بحبك يامصر

ودمت أخى بخير

واحد من العمال يقول...

عمنا الغالى /فشكووول

لا شكر على واجب
ولازم نشوف لإبليس شغل
لأن الأباليس كتروا قوى ومأثرين على شغله وأكل عيشه
الراجل مش لاقى شغل

ودمت ياعمنا بخير

واحد من العمال يقول...

حلـم،،

أشكرك على الزياره
نورتنى والله
وأتمنى أن يدوم التواصل

ودمت أخى بخير

واحد من العمال يقول...

لاسع افندى

منور المدونه

انت كمان عايز تهاجر من مصر
يعنى نسيب البلد
وميبقاش فيها حد لاسع
ده كلام


ودمت أخى بخير

مصعب صلاح يقول...

السلام عليكم

أخي الكريم / أولا شكرا على جرعة الامل اللي اديتها لي لما قلت شايف فيك اديب كبير

ثانيا / ليه جرعة الاحباط دي اللي ف البوست

صحيح مصر كلها عاوزه تهااااااااااجر

لكن برده مصر هي أمي

وأنا محب ست الحبايب

تقبل مروري

إيناس حليم يقول...

:) علي سلامة مبيقلش حاجة مش حلوة ومش بتمسنا اوييييي

بالنسبة لموضوع الهجرة انا مش ضده.. ولا معاه
بس عندي نظرية ان العمر ايامه مش كتير اوي.. واللي يلاقي راحته في مكان يروحو ويعيش فيه ويتبسط فيه
ايا كان المكان ده فين في العالم..
مش هنقدر ننكر ان فيه ناس كتير مبسوطو ومرتاحة انها بره مصر, وفيه ناس كتير برده مش طايقة تبعد عنها

في النهاية كل واحد ينام على الجمب اللي يريحو.. اللي يقدر يدي البلد حاجة يديها
بس ميستناش ياخد منها حاجة لأنه مش هيلاقي حاجة

ده رأيي حتى لو نس كتير شافته غلط

تقبل مروري

سبهللة يقول...

القصيدة اكتر من هايلة
احييك عل ىاختيارك
وانا واحدة من اللى عايزين يخرجوا برة البلد
مش قلة انتماء
بس بحبها اوى ومش عارفة اعملها ايه
حاسة بالعجز والفشل
وقلة الحيلة
عشان كدة نفسى اهج

واحد من العمال يقول...

مصعب صلاح
وعليكم السلام ورحمه الله وبركاته

أسلوبك أسلوب أدبى وشيق
أنا مش أديب
بس بعرف أستطعم الكلمات والجمل
ومش بجاملك والله
والإحباط طاغى اليومين دول
وحال البلد ميسرش
لكننا كلنا أمل
ومش حنيأس

ودمت أخى بخير

أخي الكريم / أولا شكرا على جرعة الامل اللي اديتها لي لما قلت شايف فيك اديب
كبير
ثانيا / ليه جرعة الاحباط دي اللي ف البوست
صحيح مصر كلها عاوزه تهااااااااااجر
لكن برده مصر هي أمي
وأنا محب ست الحبايب تقبل مروري

واحد من العمال يقول...

الأخت / إيناس حليم

طبعاً أنا معاكى فى إن كل واحد ينام على الجنب اللى يريحه
بس ميستناش ياخد منها حاجة لأنه مش هيلاقي حاجة
ليه طيب مين اللى بياخد خيرها ؟؟ ما إحنا بنديها علشان تدينا
لوفيها عدل ممكن !!!

ودمتِ بخير

واحد من العمال يقول...

سبهللة

منورانا والله
وأشكرك
بس المشكله لو هجينا منها كلنا همه مش هيسيبوها ونبقى سبناها لهم
ما همه عايزين كده

ودمتِ بخير

حلـم،، يقول...

اخي ورفيقي العامل الكادح..قد تكون انت والشاعر علي حق..ولكن الحل ليس الهروب من بلادنا..واذا شرعنا هذا الهروب لمن نتركها لبقايا الطغاة وباقي الامبريالية من باب اولي اي يغادرها من يسيء لها ويدوس علي كرامتها والشعوب لاتفعل ذلك بل تحارب..هذا العرش الذي يتربع علية تجار الاوطان شيدة ابناءنا وجنودنا وامهاتنا الثكلي وشهدائنا وجرحنا وعمالنا..فنحن اولي بة من حجر علي رقعة الشطرنج..هذا الصوت غدا سيرفع راية النصر والتغير فلا تتوقف اصرخخخخخخخخخخ..حلم

محمد فوزي يقول...

ايه يا ريس إحنا هنتبادل حالات الإحباط ولا إيه , طب ده انا حتى قولت إنك متحصن بحبك لشغلك وشركتك النادر اليومين دول , متهيألي إنها حاله طارئه , وانا بصفتي شخص متغرب بقولك أنا بحلم باليوم اللي أرجع فيه مصر لأني صدقني حاسس إن كل يوم بيعدي بخسر أكتر ما بكسب , وبعدين إحنا إتخلقنا عشان نتحدى ونصلح مش عشان كل واحد ينام على الجنب اللي يريحه
يعني حتى لو سافرنا شويه لازم نرجع بلدنا تاني

أغضبني قوي تعليق طظ في مصر
عيب قوي عييييييب

تحياتي يا أجدع عامل في العمال

GiGi worled يقول...

جميله مع انى سمعت انه مينفعش نتريق على اي حاجه من الغيب حتى اذا كانت الشيطان
بس عامه هى حقيقه
تحياتى وبلاش احباط
الدنيا وردى

انت تسال والكمبيوتر يجيب يقول...

كيف تعرف اذا كنت مدمنا للأنترنت ام لا؟
هل يجدد طعم البيتزا السياسه فى الشرق الأوسط؟
الأمثال الشعبيه بعد تعديلها لتلائم العصر
بعض الموضوعات الجديده تماماغير المسيوقه على النت
http://netonradio.blogspot.com

سعداءبالمرور هنا وندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.
سنشير الى مدونتك فى البرنامج اذا لم يكن لديك مانع
وننتظر تعليقاتك على ما نطرحه من اسئله وموضوعات فى مدونتنا وهذه التعليقات تذاع ايضا مع الموضوعات المعلق عليها
وبالمدونه يمكن الأستماع الى حلقات سابقه من البرنامج عن مدونات اخرى نختارها لتميزها.
وبموقعنا تفاصيل اكثر
المدونه
http://netonradio.blogspot.com
الموقع
http://stop.to/cairo
وبالموقع رابط تحت الساعه الى اليسار ليدخلك الى مجموعتنا على الفيسبوك واسمها انا والنت حيث يحكى الزملاء فى المجموعه حكاياتهم مع النت وندعوك للأنضمام اليه
تحاتنا وامنياتنا لك بالتوفيق

واحد من العمال يقول...
أزال المؤلف هذا التعليق.
واحد من العمال يقول...

العزيز صاحب حلم

أحياناً ماتنتابنا جميعاً موجه إحباط
لأننا بشر
لكن حيفضل جوانا الأمل والحلم
لأننا لو بطلنا نحلم نموت
ونسيبها لمين ياصاحبى ؟؟
ماهمه عايزين كده..
عايزينا نطفش
وبعدين يجيبوا شعب على مزاجهم
شعب لا بيحلم ولا نفسه يبقى حر
ولا بيفكر ولا بيقارن
وحنفضل قاعدين

ودمت أخى بخير

واحد من العمال يقول...

د / محمد فوزي
منورنا والله يادكتور
وبعدين لا حنتبادل الإحباط ولا حاجه كل الحكايه إن الجو العام فى مصرنا محبط ولا يبشر بإقتراب الأمل الحلم
وعارف إن اليوم اللى بيقضيه المصرى فى الخارج مش محسوب من عمره الحقيقى
وربنا يقوى المصريين فى الغربه ويرجعوا لنا بالسلامه
وبالنسبه لتعليق طظ فى مصر معلش ولازم نستحمل الكل زهقان وحيطق
وإن شاء الله
بكره حيبقى أفضل

ودمت أخى بخير

واحد من العمال يقول...

العزيزه / GiGi worled

منورانا والله
ومعلش شطحات شعراء لكنها بتعكس الوضع بالضبط
ويسقط الإحباط
وإنشاء الله بكره أحلى
ما إحنا لازم نحلم
وأهى موجه إحباط وتعدى

ودمتِ بخير وبتفائل

أم أحمد المصرية يقول...

اخي الفاضل
اول مرة ادخل مدونتك تصفحت عض مواضيعها سريعا فوجدتها تحتاج لوقت طويل فقد اعجتني موضوعاتها و اعجبني اسمها و فكرتها
اما بالنسبة للتدوينة الاخيرة فعلي سلامة دائما يدهشني بأفكاره لكن المرة دي فاقت الحدود :))
بس تفتكر احنا وحشين للدرجة دي

بستان الحب يقول...

واحد من العمال السلام عليكم :1أحيى حضرتك على مدوناتك الاكثر من رائعه 2احيى حضرتك على الايجابيه وانتماءك الغير مسبوق لشركتك 3اما عن موضوع الهجره فمن وجهة نظرى المتواضعه أن الغربه عن الاهل والوطن أسوأ شىء فى الدنياصدقنى نار مصر ولا جنة غيرها يسر الله لك كل أمر عسير

واحد من العمال يقول...

أم أحمد المصرية

نورتى المدونه والله
وأتمنى ألا تحرمينا من طلتك البهيه
وأشكر لكِ كلماتك الجميله
ده بعض ما عندكم
وعلى سلامه بيعبر عن يأسه ويأسنا جميعاً
هو فيه حد ينبسط من خطوتنا اللى محلك سر
وبصراحه إحنا شكلنا بقى وحش قوى
ولازم نعترف بمرضنا علشان نعرف نعالجه
وربنا يشفينا ويشفى مصر
وربنا قادر على كل شىء

ودمتِ فى أمان الله وحفظه

واحد من العمال يقول...

بستان الحب

وعليكم السلام ورحمه الله وبركاته

ربنا يكرمك ويعزك
أنا بصراحه بتفائل بطلتك الكريمه
وأشكرك على تلك الكلمات الرقيقه
وعلى دعواتك الطيبه
وأنا معك إن نار مصر ولا جنه غيرها
بس مش نار مصر بقت حاميه شويه ؟؟
وأدينا صابرين

وفقنا الله جميعاً الى ما يحب ويرضى

وفاء بركات يقول...

الصبر جميل أملي في بكره أحلي من النهارده
طول مافيها ناس زى حضرتك فهي بخير وعمار يامصر
سلامي لواحد من العمال المحترمين ولكل المحترمين في أى مجال

غير معرف يقول...

ياريت تنزل تهنئة للزميل محمد صبرى شرشيرة بمناسبة مولوده صبرى محمد صبرى وللك جزيل الشكر
زميل عمل

نوفل يقول...

القصيدة جميلة جدا و رائعة..قراتها أكثر من مرة و احتفظت بنسخة عنها لدي..فعلا تعبر عن واقع المجتمع العربي

رضا الكومى يقول...

إخى: واحد من العمال
مع إن الشعر جميل وفكرته جديدة
وبيشرح الواقع بالضبط ورغم الفساد لكنها بلدنا
إحنا شوفنا كتير وبنشوف وهنشوف لكن الصبر لإمتة ؟ مش عارف .

تقبل مرورى وتحياتى لك

عالم حبيب يقول...

ما شاء الله لا قوة إلا بالله

جميلة القصيدة بتاعة هجرة ابليس .. الله المستعان .. بجد ممكنون وصلنا للدرجة دي .. ان ابليس نفسه طفش مننا .. ربنا يرحمنا برحمته .. بس بجد جميلة :)