.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

19 أكتوبر، 2009

وضع التعليم فى مصر المحروسه

«إيكونوميست»: وضع التعليم فى مصر «مثير للقلق».. والفجوة بين العرب والغرب «مخيفة»

كتبت فاطمة زيدان بالمصرى اليوم ١٧/ ١٠/ ٢٠٠٩

اعتبرت مجلة «إيكونوميست» البريطانية أن وضع التعليم فى مصر والبلاد العربية «يثير القلق»، واصفة الفجوة بين العرب والغرب بـ«المخيفة».

ونوهت المجلة - فى تقرير لها أمس - بعدم وجود جامعة عربية واحدة ضمن قائمة أفضل ٥٠٠ جامعة فى العالم، والتى تضم فى المقابل ٦ جامعات إسرائيلية.

وبينما صنف المنتدى الاقتصادى العالمى مصر فى المركز الـ٧٠ من أصل ١٣٣ بلدا، فى قدرتها على المنافسة، فقد حذرت المجلة من تدنى جودة نظام التعليم الابتدائى فى مصر، إذ هبط مستواه ليبلغ الدرجة ١٢٤ على مستوى العالم.

ورأت «إيكونوميست» أنه على الرغم من إنفاق الدول العربية الكثير من الأموال على التعليم، وخطوها خطوات كبيرة فى القضاء على الأمية، وزيادة الالتحاق بالتعليم الجامعى، وتقليص الفجوات فى التعليم بين الجنسين، فإن الفجوة فى جودة التعليم بين العرب والغرب لاتزال «مخيفة»، موضحة أنها أحد الأسباب التى تجعل الدول العربية تعانى من معدلات مرتفعة وبشكل غير عادى من البطالة بين الشباب، والافتقار إلى المهارات فى القوى العاملة، «مما يفسر فشل النمو الاقتصادى فى انتشال المصريين من براثن الفقر وذلك وفقا لدراسة حديثة أجراها فريق من الخبراء الاقتصاديين المصريين».
*********
تعليق المدون
*********


أتارى المنتج النهائى لمنظومه التعليم فى مصر مضروب


أتارى عندنا


معلمين مبيعلموش


ومهندسين مبيهندسوش


ودكاتره مبيدكتروش


ومروجين مبيروجوش


ومدربين مبيدربوش


وباحثين مبيبحثوش

ولاجامعه مصريه ضمن ال 500 جامعه الأفضل فى العالم !!!!


و6 جامعات إسرائيليه موجوده فى التقييم الأفضل وإحنا لأ !!!!

طيب إزاى ياعالم إنتصرنا عليهم فى أكتوبر 73 ولا إحنا منتصرناش ولا إيه بالظبط ؟؟؟
ولا يمكن كان كدبه وصدقناها ولافيلم .. طيب يمكن كان حلم !!!!

طيب نبص حوالينا على حالنا

هل حالنا ده حال منتصرين !!!

طيب لو كنا إنهزمنا .. كان حالنا حيبقى إيه ؟؟؟

كيف ننتصر ونحرر الأرض ثم ينحدر بنا الحال ونغرق فى شبر ميه


وهم ينهزموا ثم يتقدموا ويتفوقوا علينا علمياً ويمسحوا بينا الأرض .. بعلمهم وجامعاتهم ومفاعلاتهم وإقتصادهم وتكنولجيتهم .. نعم هناك الأن تكنولوجيا إسرائيليه وبيصدروها كمان ولهم فيها ميزات نسبيه .. يعنى بينافسوا كمان .. ومين ؟؟
بينافسوا إقتصاديات راسخه وعريقه


إحنا بقى تفوقنا فى إيه صدرنا إيه وإكتسحنا بيه العالم .. والله دى حاجه تحزن


استحملونى شويه وزى ما أنتم عارفين أنا واحد من العمال ومخى اللى على قدى مش قادر يستوعب التقرير ده


تخيلوا معى مواطن إسرائيلى حاربناه وهزمناه فى أكتوبر 73

قاعد دلوقتى ومأنتخ وبيتفرج ويتجول فى الفضائيات العالميه والعربيه والإعلام دلوقتى مبيخبيش ومبيتوصاش العالم بقى عزبه صغيره


ويشاهد الشعب اللى عبر القناه وأنتصر عليه فشل فى الإنتصار على زبالته ومش عارف يتخلص منها .. بلاش نقول يستثمرها

ويتفرج كمان ويشاهد فشلنا فى القضاء على السحابه السوداء اللى مطينه عيشتنا من سنين ومع كل نفس ملوث بنتحسر على خيبتنا

ويشاهدناأيضاً وإحنا بنكره بعض .. وبنقطع هدوم بعض .. وحتى مش طايقين نسمع بعض .. ولا نقعد نتناقش مع بعض .. وكل مناقشه تتحول لخناقه وكل مخالف فى الرأى يستحق فقط الدبح


ويشاهد فشلنا فى .. وفى .. وفى

حيقول إيه ؟؟؟

حيقولنا ( هأو ) يامنتصرين يا إللى بأكتوبر محتفلين !!!!

طيب فين روح أكتوبر ياخلق هو ..

ولا كنا سالفينها ولا يمكن ضاعت أو اتحرقت أو اتسرقت

محدش شاف روح أكتوبريه تايهه يا أولاد الحلال ؟؟؟؟

هناك 32 تعليقًا:

مصعب صلاح يقول...

السلام عليكم
الحقيقة أنا مش عارف دا اسمه ايه ؟
هو التعليم ناقص
ربنا يهدي
تقبل مروري

ماما أمولة يقول...

السلام عليكم اخي الكريم

اشهد بذلك وخصوصا في التعليم المجاني

أنه لاتعليم ولا ضمير

العيب في مين الله اعلم في الاطفال ولا في الكبار ولا اللي اكبر واكبر

تعليم عقيم

حسبنا الله ونعم الوكيل

تقديري

ثائرة يقول...

السلام عليكم أخي الكريم
سعدت بزيارة مدوناتك الراقية والمفيدة
ويسعدني التواصل
تقبل مروري
تحياتي ومودتي

واحد من العمال يقول...

العزيز / مصعب صلاح

وعليكم السلام ورحمه الله وبركاته

واحشنى والله يامصعب معلش أنا مقصر
وأنت دائماً سباق للخير
وشد حيلك يابطل
الدراسه عامله ايه ى الظروف دى

ودمت أخى بخير حال

واحد من العمال يقول...

الفاضله ماما أمولة
وعليكم السلام ورحمه الله وبركاته

عند حضرتك حق
مادام التعليم والثقافه أصبحوا سلعه فى زمن حكومات رجال الأعمال اللى دينهم الربح وربهم الدولار
كيف سيتعلم من لا يدفع وهؤلاء يحكمون ويقررون

ربنا يرحمنا ويصبرنا . التعليم بالكامل أصبح مسؤليه أولياء الأمور
ربنا يعينهم ويعينا

ودمتِ فى خير حال

مذكرات تائب يقول...
أزال أحد مشرفي المدونة هذا التعليق.
ملح الحياة يقول...

لا اله الا الله.
من ساعات قرأت تدوينة عن احد طلاب الثانوي العام يقول انه ذهب للمدرسة ولم يجد طلاب ولا مدرسين...وفي اخر المطاف دخل احد الاساتدة وقرأ عليهم زيور غير مفهوم اتريه استاذ الانجليزي وعندما لم يفهمو الطلاب الثلاثة الذين حضرو من اصل 38 طالب. عندما لم يفهمو تلك الطلاسم قال لهم.بتعملو دروس خصوصية ايه رأيكم اعطيكم دروس.هههههه اتريه يلف ويدور بس عشان يقول الكلمتين.
كل الدول العربية تعاني من نفس الترجيديا
الله المستعان.

واحد من العمال يقول...

مذكرات تائب

أولاً أنا برحب بك وبحييك على صراحتك وبرحب بك فى عالم التدوين الرحب والممتع

ولكن أنصحك بتغيير عنوان المدونه
ل( مذكرات تائب ) فقط
ولا داعى ذكر التفاصيل فى مذكراتك
لأنه ذنب والجهر به سيضاعف الذنب
لأن ربنا أمر بالستر على الأخرين
وعلى أنفسنا أيضاً
والتائب من الذنب كمن لا ذنب له
وأبقى تناول الموضوع فى مدونتك
حيبقى عادى ومقبول
لكن المدونه كلها تبقى قائمه على هذا الذنب
ده اللى مش مقبول

وإشغل نفسك بالصلاه والقراءه وبالتجول بالمدونات التى تعرفها وتواصل معهم وشارك وعلق و تفاعل معهم ستستفيد كما إستفدنا وستنسى
وسيصبح لك عالم جديد
وإهتمامات جديده
ودماغ جديده لانج
وإذا أردت أن تنظر خلفك
فأنظر فقط بغضب
ودمت أخى بخير وبتوبه

وربنا يثبتك وبقويك

norahaty يقول...

لما بنتفرج
على حلقات ER
بيصعب علىّ حالنا
من كمية المعلــومات
الطبية الصحيحة والمضبوطة
الموجودة فى مسلسل تليفزيونى يبقى
الحقيقة شكلها ايه؟والتدريب العملى
شكله ايه؟عارف قربت أو الناس قربت
تشك ان اللى انتصر فى اكتوبر دول مكنوش مننا احنا لكن من الفضاء
زى ما بيتقال عن بناة الأهرام!

حياتى نغم يقول...

السلام عليكم ورحمة الله وبركاته

أستاذنا والله ضغطت جامد على الجرح بس المهم نتغير عندك حق فى كل كلمه والله لازلنا لانستحق النصر لا علم ولا دين ولا أخلاق ولا عدل .. ربنا يسامحنا ويرحمنا ويرد المسلمين إليه رداً جميلاً آمين .

اللؤلؤة يقول...

السلام عليكم
أشكر حضرتك على الزيارة
ودوام التواصل
ورأى حضرتك صريح جداً
دام قلم حضرتك
ودمت بكل الخير

معتز شاهين - باحث تربوي يقول...

أبسط كلمة تصف حال التعليم في مصر هي ..

مسخرة

ويبقى التواصل

محمد الجرايحى يقول...

أخى الفاضل: واحد من العمال
السلام عليكم ورحمة الله وبركاته
عندما قرأت تدوينتك تلك ، تذكرت على الفور قصة بسيطة للغاية جاءت فى كتاب الاستبداد لــ ( عبد الرحمن الكواكبى)..
سأل مرب سويسرى ، أحد حكام الشرق : لماذا لايوجد اهتمام بالتعليم لديكم ؟
قال الحاكم : لأن الشعب المتعلم يصعب حكمه.

سكت الكلام

رئيس التحرير يقول...

(بالنسبه للمشاركه
مهمه طبعاً
ولكن عند الأهتمام والتفاعل ياصديقى
ولابد من وجود عائد المشاركه للنشر والتأثير أو لمجرد التحفيذ وإثاره التفكير
ودمت عمنا بخير حال)
صديقي العزيز....
السابق نص تعليقكم في مدونتي ...و لو تركت كلماتكم كتعليق علي موضوعكم لكانت مناسبه بالفعل ولا غبار عليها و دي مشاركه ...ودا أهتمام ايضاً لكن ينقصنا التفاعل و العائد منه .
تماما كما يحدث في انبوبه الأختبار.لا بد من الألتحام كي يتم الأقتحام و تنهار جُدران الظلام .
دمت صديقي العزيز ...
خالص الود والتقدير .

ذو النون المصري يقول...

انا بعلم ابناء السعوديه حاليا و اقولها بصدق انه علي الرغم من الامكانيات الهائله التي يتمتع بها الاولاد هنا مقارنة بنظرائهم المصرين الا ان ابناءناا لمصريين و الله كتر خيرهم
بيعملوا من الفسيخ شربات و بيغزلوا برجل حمار

Dr Ibrahim يقول...

إيه الحقد والغل دا يا أخى

دا التعليم فى بلدنا أحسن تعليم

والنابغين المصريين بيجدوا فرص كتيرة مش فرصة واحدة للعمل خلال بيئات مناسبة تنمى مواهبهم وعقولهم والمدرسين واخدين حقوقهم والجامعات مليانة استادات كورة قصدى" معامل" وبتعمل حفلات لتامر حسنى واسبوع شبابا الجامعات قصدى"حفلات تكريم للأوائل والمتفوقين"

وربنا يهدى الجميع

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

أم أحمد المصرية يقول...

جيت علي الجرح و اسألني انا مدرسة و شايفة كل حاجة
المدرسين لسه بيشتغلوا بطريقة التلقين لأن ما حدش علمهم غيرها
و التلاميذ بيشتغلوا الدروس الخصوصية و نظام تعبئة الدماغ و تفريغها في ورقة الامتحان لأنهم ما يعرفوش غيرها
و لو حاول حد يغير النظام كثرة المشاكل و كلام المحبطين من حوله تسد نفسه
بس بجد و الله انا ردوا بحاول و فيه ناس كتير بتحاول بس المطلوب نسف النظام القديم

ربنا يعطيك و يعطينا العمر

واحد من العمال يقول...

ملح الحياة

منورانا وأعتذر عن التأخير فى الرد عليكِ وعلى جميع الأخوه المعلقين

نعم أختنا الكريمه
فكلنا فى الهم عُربُ
وربنا يشفى

ودمتِ فى خير حال

واحد من العمال يقول...

الأخت ثائرة
وعليكم السلام ورحمه الله وبركاته

سعادتنا أكبر بتلك الطله البهيه
ونتمنى ألا تكون الأخيره
وأشكر لكِ كلماتك الطيبه

ودمتِ فى خير حال

واحد من العمال يقول...

واحد من العمال يقول...
norahaty
منورانا والله

تابعت بعض الحلقات وذهلت من كم المعلومات الطبيه وأيضاً تفاصيل التفاصيل
دول ناس بيحترموا ويقدسوا العلم وبيحترموا الأنسان .. والعمل لديهم قيمه قبل أن يكون وسيله
وبيسعوا دائماً للأفضل
وأقدر أقول إنهم أصحاب همه وعاليه كمان
إحنا بقى مفتقدين هذه الهمه

وربنا يرزقنا الهمه

ودمتِ فى أمان الله

واحد من العمال يقول...

norahaty
منورانا والله

تابعت بعض الحلقات وذهلت من كم المعلومات الطبيه وأيضاً تفاصيل التفاصيل
دول ناس بيحترموا ويقدسوا العلم وبيحترموا الأنسان .. والعمل لديهم قيمه قبل أن يكون وسيله
وبيسعوا دائماً للأفضل
وأقدر أقول إنهم أصحاب همه وعاليه كمان
إحنا بقى مفتقدين هذه الهمه

وربنا يرزقنا الهمه

ودمتِ فى أمان الله

واحد من العمال يقول...

حياتى نغم
وعليكم السلام ورحمه الله وبركاته

ماهو الجرح جرحنا كلنا ولازم ننضفه ولازم حيوجعنا
والتغيير لازم فى كل الاتجاهات
وربتا يردنا إليه رداً جميلاً
ويهديناويسامحنا

ودمتٍ فى أمان ن الله

واحد من العمال يقول...

اللؤلؤة
وعليكم السلام ورحمه الله وبركاته

لاشكر على واجب
وسعداء بمتابعتك
ولازم نعترف بالحقيقه مهما كانت مره


ودمت بخير حال

واحد من العمال يقول...

الأستاذ معتز شاهين - مستشارنا التربوي
نورتنا

حضرتك لخصت المشكله فى كلمه واحده
ولكنها كافيه جداً لافض فوك
هى فعلاً مسخره
حننكر يعنى!!


ودمت بخير حال

واحد من العمال يقول...

الأخ الفاضل /محمد الجرايحى
وعليكم السلام ورحمه الله وبركاته

أيوه هو كده فعلاً
وكلنا عارفين
بس لحد أمتى
رحم الله الكواكبى
ولله الأمر من قبل ومن بعد

ودمت بخير حال

واحد من العمال يقول...

رئيس التحرير

هو فعلاً التفاعل مهم لكننا لانضمن درجه تفاعل المتلقى
ولكنى يكفينى حالياً أن يشاركنى المتابع فى أن يكرر سؤالى على نفسه ويندهش معى
ستقول مش كفايه
التساؤل والإندهاش أعتبره مشاركه وتفاعل وممكن يؤدى للتلاحم الفكرى القادر مستقبلاً على الفعل

ومادمنا ملكنا القدره على السين
سنمتلك القدره على الجيم

ولا إيه رأيك ؟؟
وأعتذر لتأخرى فى الرد
كنت مشغول شويه كانت الدنيا لاهيانى
والحديث موصول

ودمت صديقي العزيز بخير ومتسائل

واحد من العمال يقول...

ذو النون المصري

منورنا يافنان
تقول
الا ان ابناءناا لمصريين و الله كتر خيرهم
بيعملوا من الفسيخ شربات و بيغزلوا برجل حمار
----
بس من غير إمكانيات ياذوالنون والغريب أن بلدنا مليئه بالإمكانيات
اللى ناقص عندنا هو الأهتمام بهؤلاء الأبناء والأستثمار فيهم لأنهم هُمه بُكره
حفظك الله ورعاك

ودمت أخى بخير حال

واحد من العمال يقول...

Dr Ibrahim

ماشى يادكتور
وفعلاً أنا حقودى وغلاوى كمان
وكل شىء تمام التمام
وإحنا ماشيين من نصر لنصر
ومن إنجاز لإنجاز
ده إحنا حتى زهقنا وملينا من الإنجازات
والإنتصارات العلميه وزهقنا كمان من التصدير ونفسنا نستورد بقى
حقودى بقى وغلاوى حبتين
وسامحنى
واعتبرها تخاريف حقودى
وأضحكتنى أضحك الله سنك

ودمت بخير حال

واحد من العمال يقول...

رابطة هويتي اسلامية

أحييكم على مجهوداتكم الرائعه المستمره بإذن الله
والأستاذ معتز شاهين صاحب مدونة إحنا وهما صديق قريب الى قلوبنا لما نجد لديه دائماً كل مفيد وجديد
وربنا يوفق ونقدر نشارك

وتحياتى دوماً

واحد من العمال يقول...

أم أحمد المصرية

منورانا
المشكله فى التلقين والحفظلأنه كله بعد كده بيطير ولابيتعلموا كيفيه البحث ولا أساليب التفكير
بصراحه التعليم لدينا محتاج ثوره
وبعدين المجهودات الفرديه رغم وجودها من المخلصين لاتكفى
المفروض تطوير التعليم يبقى هدف وطنى
وربنا يعطيك و يعطينا العمر

ودمتِ بخير حال

رضا الكومى يقول...

الغريب إن أى مسئول عارف الكلام ده
والكل بيظهر فى وسائل الإعلام ويقول أحلى كلام
ويتكلم عن اأخطاء فى التعليم
طب مين الغلطان
طب نبدأ منين علشان نصلح