.... تنويه ....جميع الإعلانات بالمدونه مجانيه ... علشان خاطر عيون كزد فقط لا غير .... مع تحيات واَحد من العمال

16 يناير، 2010

سلطه الحمص العربيه ومديره الخدمات

قال دان شيفتان هو أحد كبار المحاضرين فى جامعة تل أبيب «عندما ترسل إسرائيل قمراً صناعياً للفضاء، يخترع العرب نوعاً جديداً من سلطة الحمص»، بهذه العبارة يبدأ البروفيسور دان شيفتان محاضراته لإعداد القادة الإسرائيليين القادمين من الأجهزة الأمنية الإسرائيلية، والموساد، والجيش، والأحزاب، وقاعات الكنيست.وخلال محاضراته يحرص «دان شيفتان» على تلخيص آرائه العنصرية فى العرب على هذا النحو: «العرب هم أكبر فشل حدث فى تاريخ الجنس البشرى»، و«لا يوجد شعب فى العالم أكثر جنوناً من الفلسطينيين»، و«الحرب بين العراق وإيران كانت سبع سنوات من المتعة الخالصة، وكم تمنينا ألا تنتهى أبداً»

تعليق المدون
*********شوفتوا الحقد والغل بس حتى الأن عنده حق ولكن المصيبه اننا سعداء بحالنا ولا نحاول البحث عن طرق جديده ومختلفه للخروج مما نحن فيه .. من مرحله سلطه الحمص .. فمتى سنصحوا من النوم

*********************
كزداويات
*****************
وصلتنى ثلاث تعليقات لزملاء يشكون فيها من السياسات المتبعه بالعياده والتى تهدف فى رأيهم الى حجب الخدمات عن العاملين المرضى بتحويلهم الى المستشفيات ومنها مستشفى الأمريكان التى لايجدون بها كل مره الطبيب المختص وذلك بدلاً من تحويلهم الى الأطباء المتعاقد معهم كما كان متبعاً من قبل .. وأيضاً بتحديد مستشفى السلام الخاصه بكفر الزيات كجهه وحيده للمبلغين عن إشارات مرضيه للكشف عليهم وفى ذلك تعسف كبير وإرهاق للمريض وأهله وللمرضى الذين تستدعى حالتهم الذهاب لطبيبهم المتابع وخصوصاً مرضى الفشل الكلوى وأمراض أخرى وأيضاً الزملاء من خارج كفر الزيات أهلهم سيحتاسون بهم أثناء أزماتهم المرضيه وبعضهم يكون غائباً عن الوعى



وقد راجع الزملاء مديره عام إداره الخدمات وقالت لهم أن تلك القرارات صادره من رئيس مجلس الأداره وليس عليها إلا التنفيذ

ولكننا وجدنا بالبحث والسؤال أن تلك القرارات والتى لاتهدف إلا الى ارهاق الزملاء المرضى ليس لرئيس مجلس الأداره دخل بإصدارها
وأنها قرارات تنظيميه صادره من مديره عام الخدمات والغريب والعجيب أنها صاحبه مرض مزمن .. ومن المفروض أن تشعر بالمرضى أمثالها وبالمعاناه التى يتكبدونها للذهاب لمستشفى الأمريكان بطنطا والعوده أكثر من مره لعدم وجود الطبيب المختص أو المناسب دائماً

وبالبحث عن طريق زملاء لهم علاقه بالعياده وجدنا أن سيادتها تعالج بطرق إستثنائيه بكونها تكشف وتتابع مع أطباء لاتتعاقد معهم شركتنا وحصلت على علاج مرتفع الثمن بالقياس بما يصرف لباقى الزملاء وأعادت صرفه مره أخرى أيضاً .. يمكن بترد الجميل .. جميل العلاج الأستثنائى عن طريق إيذائها لزملائها المرضى وتشتيتهم كى لا يحصلوا على حقوقهم و يحدث توفير فى نفقات العلاج وتكون كده عملت إنجاز والريس التى تنسب إليه تلك القرارات ليس له علاقه بتلك القرارات المشينه ويقول سيادته المريض يجب أن يعالج بأفضل وجه
لكنى أرى أن المشكله الرئيسيه هى فى الزملاء المتمارضون والذين يحصلون على حق ليس لهم وبالتالى يؤثر ذلك على صاحب الحق الأصيل وهوالمريض فعلاً ومادام طبيبنا لايستطيع كشف هؤلاء المتمارضين ويراضى الجميع فلا أمل فى وصول الحقوق الى أصحابها
ولقد تعمدت عدم نشر التعليقات لما بها من ألفاظ وتطاول على المذكوره من قبل أصحاب التعليقات ولهم العذر ولأن هناك تعليق به من الوقائع ما يكشف شخصيه صاحبه ومن الممكن أن يعرضه للأتهاض من قبل المشكو منها .. ولأنه مش ناقص وكفايه المرض إللى هو فيه


وفى النهايه نهيب بالسيد رئيس مجلس الأداره الأب والأنسان



بأن يوقف تلك الممارسات المريضه



والتى تسىء إلى سيادته وإلى الشركه



وإلى ما تقدمه من خدمات للعاملين



والمشكله ياريس فى المتمارضين



وشكراً مقدماً ياريس

ولقد كان هناك اقتراح لأحد الزملاء المعلقين أصحاب الشكوى بس دمه عسل .. وهوأن نحدد يوماً وساعه محدده للدعاء على مديره الخدمات بكذا وكذا وكذا..... وأن نُأمن جميعاً معاً خلف الدعاء فى ساعه ولحظه واحده .. لأننا لانملك تغييرها ولا محاسبتها .. بس أنا رأيت تأجيله لوقت أخر والأكتفاء بالرساله التاليه

إلى الزميله مديرعام إداره الخدمات أقول

نتمنى ألا تكونى معنا .. ولا بيننا العام القادم .. وبس خلاص

وإلى الزميل المهندس سيف أين أنت ولا نسيتنا خلاص مش معقول !!
وهناك هديه قيمه لمن يعرفه صاحبه الصوره
تحديث فى18/2/2010
كزداوى من الحسابات يقول...
السلام عليكم ورحمه الله وبركاته برافو ياواحد من العمال بس ياريت تضبف على الرساله الموجهه الى مديره عام الخدمات الأضافه التاليه من عندى وأظن الكثير من الزملاء حيوافقوا عليها وتكون الرساله كالتالى إلى الزميله مديرعام إداره الخدمات أقول نتمنى ألا تكونى معنا .. ولا بيننا العام القادم .. ولن ننعيكِ ولن نشيعك وبس خلاص وبكده الرساله تكون أقوى
13 فبراير, 2010 01:23 ص

أشكر الزميل كزداوى من الحسابات على متابعته وتواصله معنا وعلى اضافته أيضاً .. وصراحهً كنت قد أكتفيت بنشرها فى التعليقات ولكن هناك مادفعنى لنشرها بالصفحه الرئيسيه
فبعد أن شيعنا زميلنا الراحل أبراهيم السقا رحمه الله إلى مثواه الأخير ومغادرتنا للمقابر سمعت أحد الزملاء يقول لمن يسير معه خليها تفرح وتشبع بالسبعه وعشرين جنيه كانت بتقول عليه كداب .. أهه سابلها الدنيا كلها ربنا ينتقم منها .. فأستفسرت عن الموضوع فحكى لى الزميل أن المرحوم كان عامل أشاره مرضى وكشف وقد كان له المبلغ المذكوروكان مش قادر يتكلم ولا يأخذ نفسه .. ورفضت مديره الخدمات صرف السبعه وعشرون جنيهاً .. المهم وبعد شد وجذب وحلاً للمشكله قام الزميل عبد الحميد الأتهم بدفع المبلغ من جيبه على أنهم من العياده
ونحن زملاء المرحوم لا يسعنا إلا أن نتقدم
بخالص الشكروالتقدير
للزميل العزيز
عبد الحميد الأتهم
على موقفه المشرف وجزاه الله كل خير
وللزميله الغير عزيزه بالمره .. مدير عام إداره الخدمات نقول أبقى أشبعى بيهم .. بالسبعه وعشرين جنيه .. ياناصحه يامدبره ويا أنسانه
ورغم وجود أمثالك فى كزد
حنفضل نقول
كزد حتفضل غاليه عليا
أيوه حتفضل غاليه عليا
والله يرحمك يا أبراهيم ياسقا ولندعوا الله أن يجعل معاناته من المرض ومن مديره الخدمات خصماً من سيئاته واضافه لحسناته ولروحه منا جميعاً الفاتحه

هناك 44 تعليقًا:

شمس النهار يقول...

موضوع الجزء الاول من التدوينه
للأسف حقيقه مره

انظر علي حالنا
عاملين زي الصعيدي اللي اشتري العتبه الخضراء

شوف سفهاء العرب المليارديرات بيعملوا ايه بالفلوس
شوف الي اي حد بعدنا نحن فيما بيننا عن ربنا

شوف وانت ادري مني لو في مصنع ولمع نجم عامل مبتكر بيتعمل فيه ايه

اما موضوع العيادات بالرغم اني مش معاكم في المصنع
بس المصريين طول عمرهم يفعلوا نظرية ابو بلاش كتر منه
والقي نظره علي اي اوبن بوفيه اللي المفروض بيكون فيه ناس شبعانه


سلامي

عطش الصبار يقول...

واحد من العمال
سعدت جدا بمروىك وسعدت جدا انه فيه حد فى الزمان ده وفى البلد بيحب مصنعه بالشكل ده ولو كل الناس كانت بتحب عملها ما كانتش مصانعنا اتبلعت واتباعت وما كانش ده هيبقى رأى الصهاينه فينا احنا فى الستينات قدرنا نصنع الماء الثقيل وطبعا مش هتكلم عن المصانع
اما العيادات
انا مع الاستاذه شمس النهار ان فيه محترفين عيادات اما تزويغ او ادويه وده بيضيع الناس اللى ليها حق
ربنا يبارك فى مصانع مصر وعمالها المخلصين
تحياتى

حفيدة عرابى يقول...

طيب ليه الاكتئاب المضاعف ده
من أجمل كلمات نزار قبانى عن النكسة
لم يدخل اليهود من حدودنا
وانما تسربوا كالنمل من عيوبنا
اما السيدة مديرة الخدمات
ففى مثل بيقول
أصبر على مدير السوء
يايرحل
يا ..............
ربنا كبير

غير معرف يقول...

يارب اوعد السيدة/ مدير عام الخدمات بالمرض كمان علشان تحس بالمرضى شويه...امين

من المخازن يقول...

ينصر دينك ياواحد من العمال
بس أنا شايف ان احنا ندعى عليها احسن
تسلم ايدك ولسانك

elekomm - إليكــم يقول...

السلام عليكم

هو صح وضع العرب ضعيف ومتفكك ولكن وبالرغم من قوة اسرائيل ستظل مصر والسعودية ومن ورائهم العرب صخرة صامدة وعنصر الزمن معنا... ولكن الاهم الان هو ان نصلح من انفسنا ليأتي الوقت للنهوض..

بس والله عنوان التدوينة شدني ^^; وين صحن سلطة الحمص .

تحياتي~ ~ ~ ~

محمد الجرايحى يقول...

أليس عاراً علينا أن يكون هذا رأى أحفاد القردة والخنازير فى أمة محمد صلى الله عليه وسلم .. والتى هى خير أمة، ولكننا أضعنا الخيرية عندما تخلينا عن إسلامنا الذى هو عصمة أمرنا ومنبع عزتنا.

تقبل اخى تقديرى واحترامى
وبارك الله فيك وأعزك
أخوك
محمد
ـــــــــــــــ
* أخى : أرجو منك مشكوراً تغيير رابط مدونتى عندك إلى هذا الرابط الجديد حتى يتم التحديث لمواضيع مدونتى
وتقبل جزيل شكرى
أخوك
محمد
الرابط
http://feeds.feedburner.com/blogspot/eigc

Dr Ibrahim يقول...

العرب فى سبات عميق..وعلى الرغم أن منهم المصريين أمثال أحمد زويل وفاروق الباز والجزائرى رئيس المراكز الطبية فى أمريكا
والكثير والكثير التى لا تسعفنىا لذاكرة فى ذكر اسمائهم..أنهم عرب ولكن على الرغم من قلتهم إنما يدل ذلك على أن هناك العقول ولكنها لا تأخذ حقها ..فيجب للإبداع أن يكون هناك مناخاً للحرية وتكريم لتلك العقول وليس بتهجريها إلى بلاد العدو وبعد نبوغهم هناك نقول أنهم ابناء العرب..!!يا فرحتنا باستفادة الغرب منهم..

مرايتى يقول...

مش المصيبه اننا سعداء لا المصيبه الأكبر إننا بنسمع وما بنحركش ساكن وبنسمع وبنتلذذ ولا نلقى بالا لما يقال أو يحدث

سنصحوا موضوع مؤجل إلى أجل مسمى

ربنا يصلح حال الأمه ويرفع عنا الغمه
ويصلح حال وضمائر موظفينا اللهم أمين

تقبل تحياتى

واحد من العمال يقول...

السلام عليكم

أعتذر للجميع عن تأخرى فى الرد

لأن بعيد عنكم وعن السامعين

النت كان قاطع تماماً

ودمتم جميعاً فى أمان الله وحفظه

واحد من العمال يقول...

الأخت الفاضله شمس النهار

منورانا ياحاجه
وكلامك فى محله
بس إحنا الفشل مصاحبنا فعلاً
يمكن بيحبنا !!!
نفسى حد يوقع بينا وبينه وياريت منعرفوش خالص .. أو حتى على فترات
مش على طول كده وفى كل حاجه

ودمتِ فى أمان الله وحفظه

واحد من العمال يقول...

الفاضله عطش الصبار

أنا إللى سعيد فعلاً بمرورك حضرتك الكريم

وأشكرك
ولكنى أقول أن مصانعنا بخير حتى التى بيعت
ولكننا نتمنى أن نفكر جميعاً فى بلادنا بطرق مختلفه وجديده على شويه همه وسنفعل ساعتها المستحيل
والذى يحز فى نفسى هى حاله الرضا والثبات التى تنتاب مديرينا وعلمائنا
وخوفهم من كل جديد
أما العياده عندنا فالمشكله عتدنا موجوده فى الطبيب الذى يراضى الكل ومش عايز يزعل حد
وربنا يهدى الجميه لما فيه الخير

ودمتِ فى أمان الله وحفظه

واحد من العمال يقول...

العزيزه حفيدة عرابى

مش اكتئاب ولا حاجه
بس مين إللى عاجبه حالنا
وبحس أن مفيش حد ناعى الهم
ودول كتير ليس لها تاريخنا ولا إمكانياتنا وتفوقت علينا وسبقتنا وإحنا محلك سر
وفعلاً اليهود تسربوا كالنمل من عيوبنا .. وأه من عيوبنا !!!!

ودمتِ فى أمان الله وحفظه

واحد من العمال يقول...

أخونا غير معرف

ما أنا قلت بلاش ندعى عليها دلوقت وأصبر شويه

ودمت فى أمان الله وحفظه

واحد من العمال يقول...

أخى الفاضل محمد الجرايحى

عار فعلاً علينا جميعاً أن نصل لهذا الوضع الخامل والمشين
نعم تخلينا عن إسلامنا الذى هو عصمة أمرنا ومنبع عزتنا وصمام الأمان لنا جميعاً كشعب مصر عموماً وعن عروبتنا وإفتقدنا العدل والأحترام أيضاً فيما بيننا وربنا يرحمناو يوفقنا لما فيه الخير ويصلح أحوالنا أمين يارب العالمين

ودمت أخى فى أمان الله وحفظه

واحد من العمال يقول...

الأخ الفاضل Dr Ibrahim

أعلم أخى أن هناك الكثيرين من المصريين والعرب وصلوا لأعلى المناصب والمراكز العلميه .. هناك وليس هنا
ولم ينعكس علمهم علينا لأن المناخ لدينا طارد وليس حاضناً لهم ولعلمهم
نقدر نقول مناخنا لايحترم العلم ولا العلماء
د/ زويل مستشار علمى لأوباما وليس لمبارك .. ليه
ولو عايزين نكبر مبنوفرش المناخ المناسب ليه ولا عايزين نفضل محلك سر
وربنا يهدى الجميع الى مافيه خير البلاد والعباد

ودمت أخى فى أمان الله وحغظه

واحد من العمال يقول...

أخى الفاضل elekomm - إليكــم

وعليكم السلام ورحمه الله وبركاته
المشكله أخى الفاضل إننا حاسين وعارفين وضعنا الحالى بالضبط
ولكن هناك حاله غريبه من الرضا والتسليم بالأمر الواقع كأننا مهزومين
ولا نسعى ولا نتحرك لتغيير الأحوال إلى الأفضل هيا دى المشكله
ومصر والسعوديه بيقضوا يومهم وخلاص وراضيين بوضع العرب الحالى ولا جديد
وربنا يصلح الأحوال

ودمت أخى بخير حال

واحد من العمال يقول...

أخونا إللى من المخازن

أشكرك
وأنت مستعجل على الدعاء عليها كده ليه
كله بأوانه

ودمت فى امان الله وحفظه

واحد من العمال يقول...

الأخت الفاضله مرايتى

طيب فيه حد مش عايز يصحى خالص من النوم!!! يمكن مات
ربنا يصلح حال الأمه ويرفع عنا الغمه
أأأأمين

ودمتً فى أمان الله وحفظه

الهيد يقول...
أزال أحد مشرفي المدونة هذا التعليق.
فارس عبدالفتاح يقول...

سلام عليكم اخي الفاضل

البروفسير دان صادق فيما قال فما فعلنا نحن تجاه ما توصلت اليه اسرائيل من علم التكنولوجيا

قد كانت حرب 1967م، الحرب الخاطفة وكانت اسرائيل تدعي انها متفوقه في الجانب التكنولوجي لذلك كانت لها الضربة الجوية التي دمر 80 من سلاح الجو المصري وبعد قرار الانسحاب الذي اصدره عامر على خلفية السويس 1956م، تم ضرب الجيش المصري ايضا بالطيران وهو ينسحب من سيناء في 24 ساعة فقط 180 الف جندي بمعداتهم وعتادهم ينسحبون من شبه جزيرة سيناء في 24 سنة يبقى دة فيه بني ادمين بتفهم اصلا

المهم

وفعلا الفلسطينيون مجانين الى درجة خطيرة جداً فكيف لشعب يتحدى هذا الاحتلال الهمجي ويقاوم ولم يترك ارضه ويرحل

الا اذا كان لديه حق ومبدأ مقتنع به الى درجة اليقين ليتحمل هذا العذاب اليومي بل اللحظي من جنود الاحتلال الصهيوني

لم يحدث في التاريخ ان شعب حدث له مثل ما يحد لهذا الشعب ومع ذلك ماذال مصر على وجوده في هذه الارض

يبقى ده جنون والا .. لا

تقبل كل التحية والتقدير

رجل تحت الصفر يقول...

من زمان الحمص ده ، حمص حمص تل ما ينقص ع النار يرقص

دلوقتي احنا اللي بننقص و ع التل بنرقص



ألف مبروك لحضرتك لفوز المنتخب


و آسف اني قعدت فترة كده بعيد عن التواجد

norahaty يقول...

كلامه صح وللأسف
ياواحد من العمال
وكمان ياريت يكون الحمص
مزروع أو معمول بأيديهم
الأ فى الغالب بيكون مستورد
من الصين !!:(

ماجد العياطي يقول...

الجزء الاول

اليهود هم اليهود مهما طال الزمان
الغريب انك تلاقي العرب مدين اديهم بالسلام الغبي وده الاغرب على الاقل اليهود واضحين في عدائهم اما العرب ...

الجزء الثاني

انا مش عارف اقول ايه بس الشكوى مهمه مع الاصرار عليها والاجتماع من اجلها
وهذا ما لمسته من كلامك بس مافيش فايده
زي ماقال الاخ ادعوا عليها احسن


انت ماحسيتش ان في رابط بين الجزء الاول والثاني الفساد ممر لدخول الاعداء

ماجد العياطي يقول...
أزال أحد مشرفي المدونة هذا التعليق.
ملك التهييس والمبسوط حالياً يقول...

أيدك على الجائزه الأول دى صوره أمنا الغوله يالئيم
دى تلاقيها دلوقت بتشد فى شعرها تستاهل

رجل تحت الصفر يقول...

معلش بقى انا هستنى الفايز

صورة مين دي ؟

أم رجل مسلوخة ؟

رضا الكومى يقول...

العرب الآن متفرقين من حول مصر لأنهم ليسوا فى أزمات
وسوف يتجمعون حولها إذا جمعتهم مصيبة واحدة أعظم من مصيبة الأقصى
فهم لا يتذكرون مصر إلا فى المصائب

غير معرف يقول...

انا واحد مش معاكوا فى الشركة بس عجبانى اوى الفكرة كلها، بس انا عندى ملحوظة وليس تعديل بس يا ريت ترد عليا ف أقرب وقت ممكن ، هل انت لما تنشر كلام زى ده على الملأ المديره بتاعتك حتبطل اللى هيا بتعمله ولما تدعى عليا بالشكل الكوميدى ده ربنا حيستجيب؟ المشكلة اننا بنستخبى تحت راية ربنا والدعاء و هوا برئ والله من اللى احنا بنعمله عامل زى بتاع البطيخ اللى بينادى ويقول حمرا بالصلى ع النبى(ايه اللى جاب النبى للبطيخ؟) لو عايز فعلا تعمل حاجة وتلغى الوحش وتشغل الحلو اعمل حاجة صح ماتعملش زى العيال الصغيرة اللى بتقول (العبيط اهو)و ف الاخر اللى يشوفهم حيقول شوية عيال وتمنياتى بالتوفيق للشركة بتاعتكم وللى شغالين فيها

كزداوى من الحسابات يقول...

السلام عليكم ورحمه الله وبركاته
برافو ياواحد من العمال
بس ياريت تضبف على الرساله الموجهه الى مديره عام الخدمات الأضافه التاليه
من عندى وأظن الكثير من الزملاء حيوافقوا عليها وتكون الرساله كالتالى

إلى الزميله مديرعام إداره الخدمات أقول
نتمنى ألا تكونى معنا .. ولا بيننا العام القادم .. ولن ننعيكِ ولن نشيعك وبس خلاص

وبكده الرساله تكون أقوى

واحد من العمال يقول...

الأخ الفاضل/ فارس عبدالفتاح
وعليكم السلام ورحمه الله وبركاته

أنه ليس جنون ياصديقى ولكنه أيمان بالحق لدرجه الجنون
تفرق طبعاً

ودمت أخى فى أمان الله وحفظه

واحد من العمال يقول...
أزال المؤلف هذا التعليق.
واحد من العمال يقول...

الأخ الفاضل/ رجل تحت الصفر

منورنى وسعيد بمتابعتك
وفعلاً احنا إللى بننقص وعلى التل بنرقص
والله يبارك فيك ومبروك لمصر النصر
ودايماً النصر لمصر بس يكون فى مجالات تانيه كثيره وأهم

ودمت أخى فى أمان الله وحفظه

واحد من العمال يقول...

الأخت الفاضله/ norahaty

والله يادكتوره أنا كل ما أشوف منتج صينى مش الحمص والفول الصينى بس
بحس أنى بنضرب على عنقى من الخلف
ده حتى سجاده الصلاه والسبحه صينى

فعلاً نحن نعيش زمن التخلف العربى وبجداره
وربنا يشفى

ودمتِ فى أمان الله وحفظه

واحد من العمال يقول...

الأخ الفاضل / ماجد العياطي

سعيد بمتابعتك وتواصلك
وفعلاً لاحظت الرابط بين الجزئين
وهو الفساد .. بس الفساد هنا فساد عقول وهو فعلاً أسهل مدخل لدخول الأعداء لأرضنا وعقولنا

ودمت أخى فى أمان الله وحفظه

واحد من العمال يقول...

الزميل / ملك التهييس والمبسوط حالياً

أسمك حلو وربنا يزيدك أنبساط كمان وكمان
وهى غوله فعلاً بس مش أمنا
هاردلك
وبعدين ياأخى شعرها وهى حره فيه

ودمت فى أمان الله وحفظه

واحد من العمال يقول...

الأخ الفاضل / رضا الكومى

أنت فين ياراجل وحشتنا

ومصائب العرب كثيره صحيح
وذلك فقط لأن مصر عيانه ولو ربنا شفاها هيشفى كل العرب معاها
وربنا يشفى الجميع

ودمت أخى بخير حال

واحد من العمال يقول...

الأخ الفاضل / غير معرف

كل الحكايه ياصديقى أنها وسيله لاظهار غضبنا فقط لا غير وتوصيله لمن نريد
بدل ما نطق من أفعال بعض الزملاء
ومش المقصود السخريه منها والدعاء عليها فقط
وبعدين يعنى بلاش نغضب يعنى !!

ونورتنا وسعداء بمتابعتك وبتواصلك معنا

ودمت فى أمان الله وحفظه

واحد من العمال يقول...

الأخ الفاضل / كزداوى من الحسابات
وعليكم السلام ورحمه الله وبركاته

الله يكرمك
واضافتك فعلاً تجعل الرساله أقوى
وحعمل تحديث وسأضم أضافتك للرساله

ودمت أخى فى أمان الله وحفظه

غير معرف يقول...

سعيد جدا بردك على تعليقى لأنك كدا فعلا مهتم بمدونتك كمصدر اعلامى بس انا ملاحظ ف اسلوبك انك بتخاطب فئة معينة ف شركتك بمعنى كأنك عامل المدونة لمجموعه معينة من اصدقائك متفقين معك فى الرأى مش عاملها علشان كل الناس ، تانى جزء من تعليقى ما شاء الله عليك حاطط صورة المصحف وكاتب تحتها "خيركم من تعلم القرإن وعلمه" يعنى مهتم بالجانب الدينى كمان تخيل أن كل واحد حيشتم فى المديره بتاعتكم دى اللى واضح انكم مش طايقنها انك حتاخد ذنبه إلا لو انت حاطط الجانب الدينى لجذب الانتباه فقط، انا آسف لو بكلمك بصراحة بس انت اكيد من دور ابنى وحسيت انك مهتم برأيىى السابق ونقدى للمدونة من الجانب الإيجابى والسلبى ايضا بحكم مهنتى فأنا لست معك ولست ضدك
احب اعرفك بس انت ليه لفت نظرى ف فكرتك واسلوبك ف المدونة علشان مهنتى ناقد ادبى ف احدى الصحف الشهيرة لكن بحكم المهنة ماينفعش اعرف نفسى اكيد انت عارف كدا، لأنى بدأت زيك واتمنالك التوفيق ومزيد من التقدم فى الخير فقط ومزيد من التقدم لكل العاملين ف شركتكم

"اغضب براحتك ف حدود دينك اللى انت بتحبه ومتمسك بيه"

وفاء بركات يقول...

السلام عليكم
واحد من العمال المحترمين جدا
خالص العزاء لزميلكم.. وخالص العزاء للضمير وخالص العزاء للمسئوليه
وخالص العزاء للأنسانيه ..
وعلي فكره انت مجامل السيده المديره اطن
إن صورتها أبشع من ذلك .
أنتطر مشاركتكم في الموضوع المطروح بمدونتي
تقبل تحياتي

رجل تحت الصفر يقول...

انت فين يا عم الحاج

منتظر البوست بتاعك بقالي فترة

ما فيش جديد و لا ايه ؟



طيب حتى ضيف تحديث تطمنا عليك

طهر فؤادك يقول...

السلام عليكم ورحمة الله وبركاتة
ربنا يكرمك يارب والمسلمين ...
شاركونا فى حملة "لا للتهويد " علشان نبدأ النشر بداية من السبت 6 /3 بأذن الله تعالى الله يكرمك ساعدونا
http://rasoulallah1.blogspot.com/2010/03/blog-post.html

محمدعطية يقول...

احباء شركة كفر الزيات يؤيدون ترشيح/محمد ذيدان فى اتحاد المساهمين يالشركة..